Komandante Jerál PNTL, Komisáriu Faustino da Costa. Imajen TATOLI/Egas Cristóvão

DILI, 09 fevereiru 2022 (TATOLI)— Polisia Nasionál Timor-Leste (PNTL) liuhosi ekipa konjunta kaptura autór na’in-lima ne’ebé deskonfia sona mate António de Jesus iha Elemloi-Delta, Suku Comoro, Postu Administrativu Dom Aleixo, Munisípiu Dili, segunda foin lalais ne’e.

“Ita nia ekipa konjunta kontinua halibur dadus hodi fasilita prosesu iha área investigasaun. Nune’e kaptura ona autór nain-lima hodi halo identifikasaun tanba deskonfia sira ne’e envolve iha kazu omesídu ka oho vitima António de Jesus iha área Delta I,” Komandante Jerál PNTL, Komisáriu Faustino da Costa, hateten ba jornalista sira, hafoin partisipa atividade kolókiu ho Parseiru Dezenvolvimentu iha City 8, Manleuana, kuarta ne’e.

Ekipa Konjuta ne’e kompostu hosi Polísia Nasionál Servisu Investigasaun Kriminál (PNSIK), Servisu Informasaun Polísia (SIP), Intelijénsia hosi Militár J2, Polisia Militár no Servisu Investigasaun Nasionál (SNI).  

Nune’e, Komandu PNTL fó ona orientasaun ba ekipa konjunta atu kontinua buka tuir liuhosi investigasaun kle’an atubele hetan suspeitu ne’ebé sona mate António de Jesus.

Komisáriu Faustino akresenta situasaun jerál iha territóriu nasionál la’o di’ak, maibé husu ba sidadaun atu labele públika imajen sona malu ka oho malu ne’ebé akontese iha pasadu.

“Ema balun aproveita sitasaun atuál ne’ebé akontese hodi lansa fali imajen tuan iha media sosiál ka Facebook sira halo sidadaun sira tauk no paniku liután atu halo movimentu iha tempu kalan,” nia akresenta.

Tanba ne’e, Komandante ne’e husu ba sidadaun sira hotu atu kontribui pás no estabilidade iha rai laran.

Notísia relevante: Kazu hamate António, PNTL halo identifikasaun ba ema nain-11

Jornalista: Natalino Costa

Editór       : Florencio Miranda Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here