DILI,07 marsu 2022 (TATOLI)— Divisaun Fundu Globál iha Ministériu Saúde (MS) apoia mákina PCR GeneXpert TB ida ba Klínika Bairru-Pité hodi halo halo diagnostika sedu ba moras tuberkoluze.
“Ami entrega mákina GeneXpert atu ajuda Klínika Bairru-Pité hodi halo detesaun sedu ba pasiente moras tuberkoluze sira hodi salva sira-nia vida. Tanba ita haree Klínika ne’e nia pasiente barak mai husi munisípiu 12 inklui Rejiuan Administrativu Oé-Cusse no Ambeno (RAEOA),” Administradór Divisaun Fundu Globál MS, Noe Gaspar, hateten bainhira ramata serimonia entrega mákina GenexPert iha Klínika Bairru-Pité, segunda ne’e.
Notísia relevante:Klínika Bairru-Pité rejista pasiente tuberkuloze 333, óbitu na’in-rua
Divisaun fundu globál halo parseiru ho Klínika Bairru-Pité durante tinan neen-resin ho objetivu hakarak reforsa detetasaun sedu ba kazu tuberkoluze iha Timor-Leste.
“Mákina iha maibé uza ba iha nesesidade COVID-19 nian no mákina aat ona, nune’e ita kompra fali mákina foun hodi apoia ba iha klínika ne’e atu hala’o servisu ba iha detetasaun sedu kazu tuberkoluze,” nia akresenta.
Iha biban hanesan, Jestór Klíniku Bairru-Pité, Inacio do Santos, agradese ba Governu liuhosi Ministériu Saúde ne’ebé mak apoia mákina geneXpert hodi halo detetasaun sedu ba moras tuberkoluze, HIV/SIDA no COVID-19.
“Ami espera ho mákina ne’ebé mak iha bele fasilita tan servisu klínika ne’e hodi halo detetasaun sedu ba moras TB, HIV/SIDA no COVID-19. Tanba antes ne’e ita iha mákina, maibé aat ona,” nia agradese.
Notísia relevante:2021, KBP susesu fó tratamentu ba pasiente tuberkuloze
Jornalista : Felicidade Ximenes
Editór : Florencio Miranda Ximenes
