Imajen/OMS

DILI, 13 janeiru 2022(TATOLI)— Diretór Ezekutivu Klínika Bairru-Pité, Inacio do Santos hateten, iha tinan 2021 rejista pasiente pozitivu tuberkuloze hamutuk 300-resin, maibé hosi numeru ne’e 60% mak konsege rekuperadu.

“Hosi totál populasaun ne’ebé mak mai halo tratamentu tuberkuloze iha tinan 2021 hamutuk 300- resin. Hosi A pasiente 300 ne’e iha 60% mak susesu rekuperadu no 40% mak sei ativa iha tratamentu ka simu aimoruk. Tanba ita atu hetan susesu presiza tempu tanba tenke konvese pasiente konsumu aimoruk to’o fulan neen,’’ Diretór Ezekutivu ne’e hateten ba Agência TATOLI, iha nia knaar fatin, Bairru-Pité, kinta ne’e.

Notísia relevante: MS apoiu osan ba Klínika Bairru-Pité

Hahú janeiru to’o dezembru 2021, nia dehan susesu fó tratamentu tanba pasiente kuaje rekuperadu hotu no laiha ema ida mak lakon hosi tratamentu.

“Durante tinan 2021, tratamentu iha klínika ne’e la’o di’ak liuliu ba iha moras tuberkuloze nian, maski sbalun lakon vida tanba  pasiente mai tarde,” nia akresenta.

Nune’e, Klínika Bairru-Pite agradese ba suporta finánseiru másimu husi Fundu globál Ministériu Saúde no doadór internasionál sira.

“Iha tinan ida nia laran ita-nia servisu la’o ho di’ak, maski iha situasaun COVID-19, maibé servisu sira ne’e ita kontinua halo no fó tratamentu prioridade ba pasiente tuberkuloze,” nia akresenta

Aleinde ne’e, nia informa, iha dezembru 2021 rejista moras ISPA hamutuk 1.082, diareia 294, moras kulit na’in-270 no suspeitu ba moras dengue na’in-71, hosi númeru konsege rejista pozitivu dengue na’in-ida.

Nune’e mós iha rejista inan partu hamutuk 431, labarik sira ne’ebé hetan má nutrisaun 231 no Malária 14 inklui asidente tráfegu 164.

Laiha mákina CBC 

Entertantu, Diretór ne’e informa, daudaun Klínika Bairru-Pité hasoru hela difikuldade ba ba teste raan kompletu tanba laiha ekipamentu diágostika raan  ka laboratóriu complete blood count (CBC).

“Ita durante ne’e depende loos ba laboratáriu Hospitál Nasionál Guido Valaderes (HNGV) no Sentru Saúde Comoro hodi hasai raan iha CBC ho bio-kímia,” nia akresenta.

Nune’e, Doadór sira sosa ona mákina teste CBC ho bio-kimia hodi apoia ba klínika ne’e, maibé infelizmente hein hela Diresaun Farmasia Nasionál atu fó autorizasaun ka lisensa tanba ekipamentu iha ona Dili.

“Ita hein lisensa atu hasai iha AA-Alfandega, ne’ebé ami halo ona karta ba iha Diresaun Farmasia Nasionál kuaze fulan ida resin ona, maibé ami seidauk hetan autorizasaun entaun ida ne’e mak difikuldade boot ne’ebé mak ami hasoru,” nia preokupa.

Notísia relevante:  Klínika Bairru-Pité rejista pasiente tuberkuloze 333, óbitu na’in-rua

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here