Imajen/OMS

DILI, 16 novembru 2021 (TATOLI)— Iha fulan janeiru to’o outubru, Klínika Bairru-Pité rejista pasiente tuberkuloze hamutuk na’in-333, no óbitu na’in-rua.

“Hosi na’in-333 ne’e, na’in-rua mak mate tanba tuberkuloze grave ona. Na’in-148 ho 50% mak pozitivu kabeen tasak ne’ebé sei iha fahe tratamentu no kuaze 50% mak rekuperadu ona, hafoin halo tratamentu,’’ Diretór Klínika Bairru-Pité, Inacio do Santos, hateten bainhira partisipa serimonia kombate moras infesioza endemika iha ámbitu pandemia COVID-19, iha salaun Mauhoca-Surikmas, tersa ne’e.

Notísia relevante: Timor-Leste iha kompromisu serbisu ho parseiru prevene no kura Tuberkuloze

Diretór Klínika ne’e esplika tuberkuloze nia bakteria maihosi mikro batéria tuberkuloze ne’ebé kauza prinsipál mai hosi má-nutrisaun no ema ho HIV/SIDA.

Nia apela ba sidadaun sira atu hapara fuma hodi prevene aan hosi moras tuberkuloze.

“Ema ne’ebé fumadór ne’e fasil atu dezenvolve moras tuberkuloze tanba fuma bele fó risku ba pulmaun no risku mós ba diabetes hodi afeta ba sistema imunidade ema nian,” nia esplika.

Nune’e, nia husu ba Governu atu kontinua hala’o sensibilizasaun informasaun ba sidadaun sira kona-ba moras tuberkuloze atubele iha koñesimentu hodi prevene an  hosi moras  risku ne’e.

Tanba, Klínika Bairru-Pité deteta kuaze populasaun 50% iha territóriu nasionál mak menus koñesimentu kona-ba moras tuberkuloze.

“Ami halo teste door to door ne’e deteta pozitivu tuberkuloze barak, no pasiente balun besik liu ospitál no klinika sira, maibé laiha koñesimentu atu hakbesik an ba fasilidade saúde atu halo tratamentu sedu ba sira nia an,’’ nia akresenta.

Notísia relevante: MS planeia kampaña nasionál prevene no kura Tuberkuloze

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here