DILI, 04 marsu 2022 (TATOLI)—Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco, informa daudaun ne’e STAE rejista ona eleitór provizóriu hamutuk 1.600 mak sei vota iha sentru votasaun paralelu ne’ebé estabelese iha munisípiu Dili.
Notísia Relevante: Sentru votasaun paralelu sei funsiona tanba eleitór liu ona 100
“To’o horisehik ita rejista eleitór provizóriu sira-ne’ebé mak atu vota iha sentru votasaun paralelu hamutuk 1.600 no ekipa tékniku STAE kontinua verifika, nune’e tempu badak bele taka sai iha sentru votasaun paralelu sira iha Dili,” Acilino Branco hateten ba Agência TATOLI, iha nia knaar fatin Caicoli, sesta ne’e.
STAE sei la estende tan tempu ba eleitór sira atu rejistu, maske to’o agora iha ema barak mak presiza atu rejistu maibé sei verifika dadus ne’ebé iha ona atu aloka ba kada sentru votasaun paralelu ne’ebé estabelese ona.
“Ami verifika lori haree eleitór 1.600 ne’e atu koloka ba sentru votasaun paralelu sira ida-ne’ebé depois ita sei hatene uluk eleitór sira maihosi munisípiu ne’ebé nian, nune’e ita bele lokaliza tuir sentru votasaun paralelu ne’e,” nia dehan.
Aleinde STAE taka sai lista eleitór iha postu sira, iha tempu hanesan STAE mós sei anúnsia ba komunidade katak komunidade ne’ebé hela iha Dili la presiza rejistu no tuir votasaun iha sentru votasaun paralelu tanba kartaun eleitorál Dili nian entaun nafatin vota iha Dili.
Tuir atualizasun baze dadus iha teritóriu nasionál ne’e eleitór hamutuk 864.754 ne’ebé kompostu hosi munisípiu Aileu 33.859, Ainaro 45.949, Baucau 96.875, Bobonaro 71.371, Covalima 47.965, Dili 191.423, Ermera 83.213, Lautém 48.665, Liquiça 51.160, Manatuto 35.926, Manufahi 41.012, RAEOA 51.653 no munisípiu Viqueque 58.564.
Dadus timor-oan ka eleitór sira iha diáspora kompostu hosi eleitór sira iha Korea do Súl hamutuk 1.277, Irlandia 1.264, Portugal 857 no Reinu Unidu 2.234 no Austrália hamutuk 1.487.
Notísia Relevante: Eleitór ba sentru votasaun paralelu sei rejistu iha 18 fevereiru-03 marsu
Sentru votasaun paralelu estabelese de’it iha Dili
Jornalista : Osória Marques
Editór : Cancio Ximenes
