DILI, 10 fevereiru 2022 (TATOLI)—Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco, hateten eleitór sira-ne’ebé tuir eleisaun hodi vota iha sentru votasaun paralelu iha Dili ne’e sei hahú rejistu iha 18 fevereiru to’o 03 marsu 2022 iha ida-idak nia hela fatin.
Notísia Relevante: Sentru votasaun paralelu estabelese de’it iha Dili
“Eleitór sira-ne’ebé atu tuir eleisaun prezidensiál ba tinan 2022-2027 nian iha sentru votasaun paralelu Dili ne’e, sei hahú halo rejistu iha loron 18 fulan-fevereiru to’o loron 03 fulan-marsu 2022,” Diretór Jerál STAE ne’e hateten ba Agência TATOLI, iha nia knaar fatin Caicoli, Dili, kinta ne’e.
Agora daudaun ne’e, nia dehan, ekipa ka brigada STAE nian kontinua halo sensibilizasaun ba iha komunidade inklui ba estudante sira kona-ba estabelesimentu sentru votasaun paralelu to’o loron 17 fevereiru ne’e.
Iha atividade sensibilizasaun ne’e aumezmu tempu lori formuláriu hodi breafing no entrega kedas ba parte ne’ebé apoiu ba prosesu inskrisaun mak tama ba eskola sekundáriu hotu iha Dili hodi esplika mekanizmu inskrisaun ne’e inklui ba xefe suku sira.
“Ha’u hanoin mekanizmu reguladu tuir lei ne’ebé ami esforsu halo, nune’e garante di’ak liután nomós responde preokupasaun ita-nia sidadaun sira-nian ne’ebé enfrenta difikuldade tanba osan laiha no impedementu pesoál sira,” nia esplika.
Bainhira lista eleitór ne’ebé iha impedimentu ruma, ba STAE mak STAE sei haree hotu depois mak STAE fó sai katak eleitór ida-ne’e sei vota iha sentru votasaun paralelu ida-ne’ebé.
“Ami mós hakarak hateten sentru votasaun paralelu ne’e lei garante no ami sei haree no kuidadu tebes ho nia mekanizmu ne’ebé define ona iha regulamentu sira-ne’ebé la hamosu fraude ruma no parte balun halo espekulasaun balun iha li’ur. Nune’e, liuhosi ida-ne’e bele solisiona problema sira iha pasadu sira hodi kontribui ba taxa partisipasaun. Ida-ne’e mak esforsu órgaun eleitorál nian hamutuk ho Governu,” Acilino hateten.
STAE sei pronunsia lista inskrisaun eleitór sira-ne’ebé vota iha Sentru Votasaun Paralelu iha prazu loron lima nia laran, no bainhira hatama deklarasaun ne’e tarde liu mak loron sanulu (10) antes tama ba eleisaun liu-liu dadus sira-ne’e tama ona iha STAE no STAE sei sinkroniza ho baze dadus.
Alterasaun artigu 31-A (Sentru votasaun paralelu):
- Sentru votasaun paralelu ne’e sentraliza iha kapitál nasaun nian, destinada ba eleitór inskritu sira iha unidade jeográfika resensiamentu ne’ebé lokalizada fora hosi munisípiu Dili, ne’ebé hetan impedimentu, ho razaun médika, eskolár ka ezersísiu funsaun públika, bainhira dezloka ba lokalizasaun ne’ebé de’it iha sentru votasaun sira.
- Bele mós vota iha entros de votasaun paralelu iha kualkér eleitór seluk ne’ebé inskritu iha unidade jeográfika resensiamentu lokaliza fora hosi munisípiu Dili, dezde justifika impedimentu iha dezlokasaun ba lokál ne’ebé estabelese sentru votasaun.
- Estabelese sentru votasaun paralelu tolu, ida ba eleitór ne’ebé resensia iha munisípiu Lautém, Baucau on Viqueque, ida ba eleitór sira-ne’ebé resensia iha munisípiu Manatuto no Liquiçá, Aileu, Ermera no Postu Administrativu Ataúro, no ida ba eleitór inskritu iha munisípiu Ainaro, Bobonaro, Covalima, Manufahi no Rejiaun Administrativa Espesiál Oé-Cusse Amebeno (RAEOA).
- Kada sentru votasaun paralelu só bele funsiona ho mínimu rejista eleitór atus-ida.
Artigu 31-B (Inskrisaun iha sentru votasaun paralelu):
- Eleitór ne’ebé atu vota iha sentru votasaun paralelu, rejista ho entidade saúde, edukasaun ka Komisaun Funsaun Públika, konforme trata ema ida moras, estudante ka dosente, funsionáriu ka ajente públiku.
- Eleitór sira seluk, ne’ebé refere iha númeru anteriór, ne’ebé que pretende vota iha sentru votasaun paralelu, aplika hosi STAE.
- STAE fixa no anúnsia publikamente data inísiu no termina períodu rejistu refere iha númeru anteriór.
- Entidade referida iha númeru 1 haruka ba STAE kona-ba lista eleitór sira-ne’ebé rejista ona, iha loron seguinte hodi termina períodu rejistu.
- STAE elabora lista eleitór hosi kada sentru votasaun paralelu.
- Eleitór inskritu iha sentru votasaun paralelu elimina hosi lista eleitór unidade geojráfika resensiamentu iha-ne’ebé rejista.
- Inskrisaun iha sentru votasaun paralelu vale apenas ba eleisaun subsekuente.
- Governu bele, iha sede regulamentasaun, adota medida seluk kona-ba prevensaun fraude, dezignadamente inutilizasaun kartaun eleitór, hafoin ezerse direitu votu.
Notísia Relevante: Eleisaun prezidensiál 2022: Sentru votasaun 1200 no paralelu tolu
Jornalista : Osória Marques
Editór : Cancio Ximenes
