Imajen/Media PR.

DILI, 01 marsu 2022 (TATOLI)—Parlamentu Nasionál, tersa ne’e, halo aprovasaun iha finál globál proposta lei númeru 36/V(4ª) prosede primeira alterasaun lei númeru 24/2021, 24 novembru, ne’ebé prosede primeira alterasaun lei númeru 10/2004, 24 novembru, lei Sistema Saúde no aprova medida exesional temporáriu vijilansia sanitária resposta pandemia COVID-19.

Notísia Relevante: PN altera Lei Sistema Saúde iha jeneralidade

Liu hosi diskusaun ne’e, PN halo aprovasaun iha finál globál ho votu a-favór 35, kontra 0 no abstensaun ida (1).

“Nune’e proposta lei númeru 36/V(4ª) ho alterasaun sira hotu aprovadu,’’ Prezidente Parlamentu Nasionál, Deputadu Aniceto Longuinhos Guterres Lopes, deklara liu hosi plenária, tersa ne’e.

Ho aprovasaun ne’e komisaun F trata asuntu Saúde, Seguransa Sosiál no Igualidade Jéneru sei halo redasaun finál hafoin envia ba Prezidente Repúblika hodi promulga ka veta tuir kompeténsia ne’ebé iha.

Iha diskusaun ne’e deputadu proponente Felix da Silva, Maria Barreto, Ernesto Dudu, Cidalia Mesquita ho Helena Belo, aprezenta proposta haat ba alterasaun.

Proposta númeru 1 ho alterasaun iha artigu 1, aumenta tan alinéa A (Prorogasaun vijénsia), vijensia artigu 3 lei númeru 24/2021, 19 novembru, proroga ba periódu loron 120, laiha prezuiju renovasaun foun.

Proposta númeru 2, ho proposta alterasaun artigu 1 objetu, prezente lei determina renovasaun medida exesional no temporáriu vijilánsia sanitária responde pandemia Covid-19 aprova hosi lei númeru 24/2021, 19 novembru, ne’ebé ho justifikasaun indika forma objetiva ba objetu lei konforme determina mellora regra lejístika.

Proposta númeru 3 alterasaun artigu 2 (Entrada em vigor), prezente lei tama iha vigór iha loron tuir mai hosi nia publikasaun.

Proposta númeru 4 ba alterasaun ba títulu no preamblu lei ho nia justifikasaun propoin altera títulu proposta Lei númeru 36/V (4ª) ho maneira evidénsia nia objetivu eskluzivu propogasaun períodu vijénsia dispostu iha artigu 3 Lei númeru 24/2021, 19 novembru.

Propoin altera preamblu ho forma reflete ratio lejislativa estebelese hahú lei númeru 24/2021, 19 novembru, determina períodu vijensia loron 120 ba medida exesional no temporáriu ba kombate COVID-19.

Iha fatin hanesan, Ministra Saúde, Odete Maria Freitas, hateten restrisaun ne’ebé deskreve iha lei ne’e tanba ba tuir Organizasaun Mundiál Saúde (OMS) to’o agora seidauk deklara katak Timor-Leste no nasaun sira iha mundu katak COVID ramata ona.

Tanba ne’e, ho aprovasaun lei ne’e prorogasaun atu implementa nafatin medida exesional temporáriu vijilánsia sanitária resposta ba prevensaun COVID-19 hanesan distánsia sosiál no fizíku, sai hosi uma  uza máskara ho medida sira seluk hanesan iha aeroportu viajen hosi estranjeiru mai rai laran.

“Mezmu iha implementasaun dezafiu maibé regra sira kontinua aplika nafatin tanba COVID-19 ho tan virus foun Omicron seidauk ramata,” nia hateten.

Notísia Relevante: MS propoin halo alterasaun Lei Sistema Nasionál Saúde

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here