DILI, 16 fevereiru 2022 (TATOLI)—Governu liuhosi reuniaun Konsellu Ministru (KM) halo aprovasaun ba Projetu Proposta Lei, ba alterasaun dahuluk ba Lei númeru 24/2021, loron 19 novembru, ne’ebé prosede alterasaun dahuluk ba Lei númeru 10/2004, loron 24 novembru, Lei Sistema Nasionál Saúde, no aprova medida esesionál no temporáriu Vijilánsia ba resposta pandemia moras COVID-19.
“Inisiativa ne’e aprezenta hosi Ministra Saúde (MS), Odete Maria Freitas Belo, ne’ebé Projetu Proposta Lei ne’e hodi aumenta prazu vijénsia medida sira, ne’ebé prevee iha artigu númeru 3, hosi Lei númeru 24/2021, loron 19 novembru”, Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: PR promulga alterasaun Lei Sistema Saúde, Estadu la prezisa implementa EE
Portavoz Governu ne’e dehan, alterasaun sira ne’ebé introdús, ho objetivu prinsipál atu hanesan, obrigatoriedade realizasaun teste ba indivíduu ne’ebé tama iha territóriu nasionál no kumpre izolamentu profilátiku tenke preferensialmente iha rezidénsia, karik hatudu razaun médika ne’ebé determina internamentu iha estabelesimentu saúde.
Aleinde ne’e, izolamentu profilátiku obrigatóriu iha estabelesimentu saúde, rezidénsia ka sentru izolamentu aplika ba indivíduu sira ne’ebé tama iha territóriu nasionál no la aprezenta dokumentu komprovativu vasinasaun kompleta, hatudu sintoma, no iha rezultadu pozitivu ba teste.
Bainhira tama iha territóriu nasionál no komprova iha kontaktu besik ho indivíduu pozitivu COVID-19, kondisiona mós asesu ba fatin serbisu funsionáriu públiku, ajente no traballadór administrasaun direta no indireta Estadu, tenke aprezenta komprovativu vasinasaun kompleta kontra COVID-19 ka iha alternativa komprovativu rezultadu negativu ba teste ne’ebé realiza, la liu loron-lima ka aprezentasaun sertifikadu rekuperasaun no alta médika.
Alterasaun ne’e, determina mós punisaun ho multa ne’ebé ho valór entre $30 to’o $250 ba indivíduu sira ne’ebé la kumpre norma sira ne’ebé prevee bainhira tama iha territóriu nasionál.
“Ministra Saúde sei aprova Diploma Ministeriál ne’ebé define modelu dokumentu komprovativu vasinasaun kompleta no sertifikadu rekuperasaun no alta médika,” Ministru Fidelis dehan.
Jornalista : Antónia Gusmão
Editora : Julia Chatarina
