Sekretáriu Jerál g7+, Helder da Costa, tara hela tais ba Primeiru Minsitru Taur Matan Ruak, nuudar asaun agradesementu ba apoia organizasaun g7+. Imajen/ g7+.

DILI, 28 fevereiru 2022 (TATOLI)— Sekretáriu Jerál g7+, Helder da Costa, segunda ne’e, hala’o sorumutu ho Primeiru Ministru Taur Matan Ruak, hodi hato’o  nasaun membru nian apresiasaun no agradesementu  boot ba Governu ne’ebé hatudu kompromisu hodi apoia  g7+ to’o Organizasaun Nasaun Unida (ONU) rekoñese ofisialmente sai organizasaun multilateral. 

“Ohin, ami mai ko’alia ho Primeiru Ministru tanba foin dahuluk g7+ sai hanesan organizasaun intergovernamental kompostu hosi nasaun 20 hakarak hato’o apresiasaun boot ba Governu no estadu ne’ebé apoia ona to’o g7+ hetan  ona observasaun permanente iha Nova Iorke,” Sekretáriu Jerál  ne’e hateten ba Jornalista-sira iha  hafoin sorumutu ho PM Taur iha rezidensia-Faról, segunda ne’e.

Notísia relevante:ONU rekoñese ofisialmente g7+ sai organizasaun multilaterál

Nia dehan, aprezenta kona-ba akordu ne’ebé atu halo entre Governu Timor-Leste ho g7+, nune’e Xefe Governu aseita no nia rasik iha kompromisiu atu tuir diskusaun ne’ebé hala’o iha Parlamentu Nasionál katak Governu nafatin apoia g7+ ba investimentu ne’ebé halo durante ne’e no hamorin ona naran Timor-Leste nian iha mundu internasionál.

Entretantu mós ko’alia kona-bá Parlamentu Nasional emite ona rezolusaun ida hodi públika ona iha jornál repúblika kona-ba atu estabelese forsa tarefa hodi harii rede parlementar g7+ iha nivél lejizlativa atu fahe esperiénsia kona-bá pás ho nasaun membru sira seluk.

Primeiru Ministru, Taur Matan Ruak, hasai foto hamutuk ho Sekretáriu Jerál g7+, Helder da Costa, ho ekipa. Imajen/ g7+.

“Asuntu ikus liu mak ami ko’alia kona-ba nasaun sira ne’ebé funu hela no entrega mós karta deklarasaun hosi pessoa eminente g7+ Xanana Gusmão  ba Primeiru Ministru no seluk tan,” nia esplika.

Daudaun ne’e, organizasaun g7+ iha estrutura rasik mak hanesan pesoál eminante g7+, Kay Rala Xanana Gusmão, Sekretáriu Jerál g7+, Helder Da Costa, Prezidente g7+, Francis kakai husi Sieralione, vise Prezidente g7+, Nahed Sarabi hosi Afganistaun no mós enviadu espesiál g7+ mak José Ramos Horta antigu Prezidente Repúblika Timor-Leste.

Organizasaun ne’e halo ratifikasaun karta g7+ nian, ne’ebé aprova ona iha Lomé iha sorumutuk ministeriál da-tolu, iha fulan-maiu tinan 2014, rekezitu mínimu ida atu grupu ne’e bele hetan rekoñesimentu iha ONU hanesan observadór, konklui ona hosi Afganistaun no São Tomé e Prínsipe.

Iha Timor-Leste, prosesu ne’e konklui ona no publikasaun iha Jornál Repúblika hosi Prezidente Repúblika. Enkuantu Nasaun sira seluk mós konklui daudaun ona prosesu ratifikasaun nian ne’e.

Iha sorin seluk, papél g7+ nian, hetan ona rekoñesimentu formál iha deklarasaun G7 nian, durante simeira ne’ebé hala’o iha Biarritz, iha Fransa, iha fulan-jullu tinan hira ba kotuk.

Iha deklarasaun ne’e, membru G7 nian sira hateten katak “aprendizajen entre par sira no kooperasaun Sul-Sul importante tebetebes”, iha sentidu ida-ne’e, sira “apoia diálogu internasionál kona-ba konstrusaun Pás no Konstrusaun Estadu nian” no rekoñese “estrutura husi Kooperasaun g7+, Frajil ba Frajil, ne’ebé insentiva hodi fahe esperiénsia entre nasaun frajil sira”.

Rekoñesimentu iha nivél globál ne’e mós hetan konfirmasaun hosi Estudu ida ne’ebé Sentru Estudu no Peskiza nian sira BRICS (BRICS Policy Center) foin hala’o daudaun ne’e, ne’ebé analiza influénsia g7+ nian hosi kedas nia harii iha tinan 2010, ninia ajenda sira kona-ba pás no dezenvolvimentu no atuasaun parseiru dezenvolvimentu nian sira ne’ebé foka ba Estadu frajil sira.

Organizasaun intergovernamentál g7+, harii iha tinan 2010 no organizasaun g7+, foufoun, nasaun hitu maka harii, no oras ne’e kompostu husi nasaun 20 husi Áfrika, Ázia-Pasífiku, Karaíbas no Médiu Oriente: Afeganistaun, Burundi, Xade, Komores, Kosta Marfín, Giné, Giné-Bisau, Haiti, Iemen, Illa Salomaun, Libéria, Papua Nova Giné, Repúblika Sentru-Afrikana, Repúblika Demokrátika Kongu, Saun Tomé no Prínsipe, Serra Leoa, Somália, Sudaun Súl, Timor-Leste no Togo.

Entretantu, totál populasaun husi nasaun sira ne’ebé forma organizasaun g7+ hamutuk ema millaun rihun 1,5.

Notísia relevante: g7+ Agradese PR Lú Olo

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here