Sekretáriu Jerál G7+, Helder da Costa. Imajen Egas Cristovão

DILI, 27 janeiru 2022 (TATOLI)– Sekretáriu Jerál g7+, Helder da Costa, hateten Gabinete Asuntu ba Organizasaun Nasaun Unida (ONU) rekoñese ofisialmente karta organizasaun intergovermentál (charter) ba país afetadu konflitu (g7+) sai organizasaun ida multilateral.

“Ho onra no haksolok tebes ami hakarak fó sai ba públiku katak, charter ou karta hanesan mós konstituisaun g7+ nian rejista ka sertifika ofisialmente, iha loron 12 janeiru, iha ONU liuhosi Sekretáriu Jerál, Antonio Guterres,” Sekretári Jerál  ne’e, hateten liuhosi konferénsia imprensa iha edifísiu g7+-Dili, kinta ne’e.

Notísia relevante:  PN Aprova Ona Rezolusaun Estabelese Sede G7+ iha TL

Tuir nia, ho karta organziasaun ka charter ne’ebé sertifika ona hosi ONU, hatuur ona pozisaun g7+ nian hanesan organizasaun multilateral iha Nova Iorque.

“Ba ita Timor -Leste iha relevansia tanba, ita mak hanesan uma na’in, ita mak hanesan fundadór no ita mak hanesan pionéiru iha tinan 10 liubá, hodi halibur nasaun sira iha pós konflitu, frajil sira iha Dili hodi hanaran g7+, maibé ONU sertifika ona no la’ós ne’e de’it foin lalais iha seimera CPLP nian Xefe Estadu hasai ratifikasaun ida hodi fó rekonesimentu ba g7+ nuudar observadór asosiadu no intergovernamental iha nasaun CPLP nian mós,” nia orgullu.

Daudaun g7+ serbisu hamutuk ho Komunidade País Lian-Portugés (CPLP,sigla portugés) iha konsentrasaun polítika diplomátika, atubele hametin pás no promove dezenvolvimentu atu hamorin Timor-Leste nia naran iha mundu internasionál.

Nune’e, Helder da Costa afirma estrutura g7+ agradese ba Parlamentu Nasionál ne’ebé ratifika ona tratadu g7+ nian no hetan kedas promulgasaun hosi Prezidente Repúblika Francisco Guterres ‘Lú Olo “iha 2020 liubá to’o ohin loron ONU mós iha ona rekonesimentu.

Nia afirma, atinjementu ne’e hanesan pasu istóriku ida ba Timor-Leste tanba la fasil atu ba tama iha ONU to’o hetan ratifikasaun.

Tanba tuir artigu 102 UN charter hateten momoos katak kuálker rekezitu intergovernamentál ida ne’ebé rejistradu iha Nova Iorque tenke iha charter, maibé to’o ikus g7+ prienxe rekezitu juridiku, politiku no institusionál tanba hetan suporta makas hosi Estadu Timor-Leste no Estadu membru sira seluk to’o hetan estatutu ida ne’e.

g7+ harii iha 10 abríl 2010, nuudar organizasaun intergovernamentál ne’ebe halibur hamutuk nasaun 20 ne’ebé afetadu hosi konflitu no frajilidade, hodi halo advokasia ba harii pás no harii Estadu hanesan xave ba dezenvolvimentu ne’ebé sustentavél.

Membru organizasaun internasionál g7+ kompostu hosi Timor-Leste, Afganistão, Burundi, Repúblika Centro-Africana, Chade, Comores, Costa do Marfim, República Democratica do Congo, Guiné, Guiné-Bissau, Haiti, Libéria, Papua Nova Guiné, Serra Leoa, Somália, Ilhas Salomão, São Tomé Príncipe, Sudão do Sul, Togo no Iémen

Enkuantu, g7+ nian Prezidente mai hosi Serra Leoa no Timor-Leste mak sai uma nain ho kuartél jerál iha Dili no edifísiu ida iha Lisboa, Portugál.

Iha tinan ida ne’e nia laran, sei iha tan reprezentante permanente g7+ nian iha Nova-Iorke, Estadus Unidu Amérika hodi hametin liután diplomasia no advokasia g7+ nian ba harii paz no harii Estadu.

Notísia relevante:   Kada tinan,Timor-Leste kontribui millaun $1 ba g7+

Jornalista : Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here