Adjuntu Sekretáriu Jerál Federasaun Futeból Timor-Leste (FFTL), Frederico Martins

DILI, 07 janeiru 2022 (TATOLI) – Adjuntu Sekretáriu Jerál Federasaun Futeból Timor-Leste (FFTL), Frederico Martins, informa, daudaun kandidatura ba Prezidente na’in-tolu hahú kompleta ona dokumentu atu kompete iha kongresu da-hitu iha loron 26 fevereiru tinan ne’e.

Kandidatu na’in tolu mak hanesan, Francisco Kalbuady Lay, eis Prezidente FFTL,ne’ebé propoin hosi asosiasaun tolu, propoin husi asosiasaun ida mak Franscisco Jerónimo, atuál prezidente FFTL no propoin hosi Asosiasaun ida mak  Nilton Telmo Gusmão, atuál Prezidente Liga Fotebál Timor-Leste.

“Kandidatu na’in tolu kompleta ona dokumentu, hanesan dokumentu  rejistu kriminál no foto no seluk tan ne’e dadaun kompletu hotu ona hein de’it ba kongresu,” Adjuntu SekJer, hateteb ba Agência TATOLI iha edifisiu FFTL Dili, sesta ne’e.

Kona-ba kandidatura Francisco Kalbuadi Lay iha hela rai liur, Adjuntu  Frederico dehan laiha problema tanba Kalbuady nuudar sidadaun no nia iha direitu atu kandidata-an, maski nia iha rai liur tanba estatutu la taka dalan ba nia atu kandidata.

“Laiha problema, bainhira kongresu nia tenke mai partisipa para hato’o nia programa sira iha kongresu, nia sidadaun Timor uma iha Timor moris iha Timor nia iha direitu kandidatu-an, nia dokumentu sira mós kompletu ona dalaruma sei to’o iha Timor-Leste iha tempu besik,” nia dehan.

Kumpre ba Estatu FFTL Art.37 ne’ebé afirma rekezitu kandidatura ba Komité Ezekutivu foun no Kódigu Eleitorál Art.11, maka Komité Eleitorál no Komité Judisiáriu verifika ona kandidatu sira ne’ebé submete ona sira-nia kandidatura tuir prazu ne’ebé fó sai.

Iha biban ketak, Vise Prezidente Asosiasaun Dili Oeste, Elizeu Isaac, hateten, hanesan asosiasaun ne’ebé iha direitu vota iha kongresu FFTL seifihir didiak figura ne’ebé di’ak no iha paixaun ba bola atu sai prezidente FFTL.

“Ami assosiasaun presiza lideransa ida ne’ebé mak bele fó atendimentu no fasilita asosiasaun sira bele hala’o nia servisu hodi dezenvolve futeból ba oin,” dehan Elizeu.

Tanba asosiasaun harii atu prepara futebólista-sira hosi juveníl to’o seniór atu hetan jogadór ne’ebé di’ak,  nune’e bele suplay ba klube no selesaun nasionál.

“Ho nune’e mak ami hakarak lideransa ida ne’ebé bele responde ba nesesidade futeból nian, kandidatu na’in tolu ne’e mesak di’ak hotu, maibé ami sei deside hodi fó votu ba kandidatu ida ne’ebé ami hakarak,” nia akresenta.

Entretantu, Prezidente Assosiasaun Treinadór Timor -Leste, Gaspar Quintão, hateten, nia parte sei haree kandidatu ne’ebé iha programa di’ak atu lori futeból ba oin no kria formasaun hodi hasa’e treinadór sira nia nivél ba profissionál.

“Ami iha ona pozisaun ne’ebé klaru, ami sei fó votus iha kongresu mai agora hodi hili estrutura FFTL nian foun maibé sei haree lai, bainhira sira aprezenta sira nia programa di’ak ami sei hili hodi lori FFTL ba futuru ida ne’ebé di’ak no dezenvolve futeból di’ak liután,” dehan Gaspar.

Tuir oráriu ba kongresu FFTL ba dala-hitu sei hala’o iha Dili 26 fevereiru 2022 atu hili Prezidente lidera FFTL bainhira asosiasaun hamutuk 19 fó konfiansa.

Kongresista ne’ebé iha direitu ba vota iha kongresu ne’e mak hanesan assosiasaun futeból hosi munisipiu 12 inklui Reziaun Administrativa Oe-Cusse Ambeno (RAEOA), Asosiasaun Arbitrajen, Treinadór, futeból femenina, futsal Timor – Leste no juveníl Timor-Leste no seluk tan.

Notísia Relevante:  Komité eleitorál anunsia kandidatu na’in-tolu kompete ba  ezekutivu FFTL

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here