Polisia Nasionál Timor-Leste (PNTL) realiza simulasaun hodi kombate asaun krime iha atividade kampaña no eleisaun Prezidensiál. Imajen/ Natalino Costa

DILI, 25 fevereiru 2022 (TATOLI)- Komandu Polisia Nasionál Timor-Leste (PNTL) hahú prepara membru 4.000-resin atu asegura seguransa ba atividade kampaña no eleisaun Prezidensiál iha territóriu tomak. 

“Ita bo’ot sira hatene, membru PNTL iha 4.000-resin preparadu asegura atividade kampaña no eleisaun Prezidensiál. Ami sei hatun hotu ami nia rekursu tomak ne’ebé iha daudaun ne’e atu garante seguransa ba iha kampaña no eleisaun,” Komandante Komandu Operasaun Nasionál PNTL, Superintendente Xefe Pedro Belo, hateten ba jornalista sira hafoin ensera atividade prátika simulasaun iha ediíisiu Komisaun Nasionál Eleisaun (CNE, sigla portuges) Colmera, sesta ne’e.

Notísia relevante:PNTL halo simulasaun kombate asaun krime iha kampaña no eleisaun

Komandante Komandu Operasionál Nasionál (KKON), Superintendente Xefe, Pedro Belo. Imajen/Eugénio Pereira.

Membru PNTL 4.000-resin kompostu hosi Unidade Polisia Batallaun Ordem Públiku (BOP), Unidade Espesiál Polísia (UEP), Seguransa Pesoál Polísia (CSP), Komandu Operasaun Espesiál (COE), Forsa Reserva (Taskforce), Unidade Polísia Marítima (UPM) no servisu intelijénsia polisia sira.

“Kona-ba mental no lojístika ba membru sira ne’e  ita preparadu atu halo seguransa ba kampaña no eleisaun nian hodi populasaun sira labele iha ameasa no tauk hodi halo movimentu,” Komandante Pedro Belo akresenta.

Nune’e, iha segunda (28/02), Komandu PNTL halo abertura formatura jerál hodi desloka membru sira ba territóriu laran toma atu asegura kampaña iha loron 2 marsu no eleisaun ne’ebé realiza iha loron 19 marsu.

“Ita husu ba membru PNTL sira atu kuidadu saúde no fíziku hodi bele halo seguransa iha eventu kampañaa no eleisaun ho di’ak,” nia enkoraja.

Alende ne’e, Komandante Pedro Belo kongratula ba membru sira tanba halo ona simulasaun ba preparasaun atu asegura festa demokrásia ne’e.

“Ha’u agradese ba ita bo’ot sira, ita hotu ne’ebe mak iha ne’e, tanba simulasaun sira ne’ebe hosi ohin dader, to’o loraik ne’e, ita konsege hatudu ho di’ak no buat hotu la’o diak no la’o ho susesu. Simulasaun sira ne’e nuudar formasaun atu hasa’e konesimentu membru sira hasoru situsaun risku sira iha kampaña no eleisaun,” Pedro Belo kongratula.

Prátika simulasaun ne’e hanesan meiu ida membru PNTL uza forsa hodi atua situsaun nesesáriu sira ne’ebe akontese iha ámbitu kampaña no eleisaun.

Notísia relevante:  PNTL distribui viatura ba komandu munisípiu asegura kampaña no eleisaun

Jornalista: Natalino Costa   

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here