Veíkulu Estadu ne’ebé sei entrega MF entrega ba MI hodi apoia servisu seguransa durante kampaña eleitorál, segunda (21/02). Imajen/MF

DILI, 22 fevereiru 2022 (TATOLI)— Komandu Polisia Nasionál Timor-Leste (PNTL), distribui karreta 36 ba Komandu munisípiu sira atu asegura atividade kampaña no eleisaun prezidensiál ne’ebé realiza iha 19 marsu tinan ne’e.

Viatura Estadu hamutuk 36 ne’e oferese hosi Ministériu Finansa ho baze ba pedidu hosi Komandante Jerál PNTL Komisáriu, Faustino da Costa ne’ebe husu apoia viatura balun atubele fortifika atividade PNTL nian iha seguransa iha eventu demokrátiku ne’e.

“Ita husu ba Governu atu resforsa  transporte hodi  tulun PNTL sira nian servisu operasionál iha atividade kampaña no eleisaun. Tanba ne’e maka ita hetan resposta hosi Governu no ita hetan ajuda karreta 36, nune’e Komandu ohin deside distribui  ba Komandu Munisípiu atu halo servisu operasionál ba atividade kampaña no eleisaun,” Komandante Jerál PNTL, Komisariu Faustino da Costa, iha ámbitu entrega karreta 36 ba Komandante Munisipiu sira  iha Kuartél Jerál PNTL , Caicoli-tersa ne’e.

Karreta 36 ne’e distribui ba kada komandu munisípiu hetan rua to’o tolu tuir nesesidade Komandu nian. Enkuantu veíkulu hirak ne’e sei tau sticker Polisia nian durante membru sira uza hodi halo seguransa.

Nune’e, Komandante PNTL ne’e husu ba Komandu Munisípiu sira atu kuidadu didi’ak  karreta no uza ho resposabilidade perante festa demokrátiku ne’e.

Ba komandante unidade sira, nia dehan Komandu PNTL sei aluga tan karreta balun hodi ajuda servisu PNTL ho másimu hodi asegura kampaña no eleisaun ho diak liután.

“Karreta 36 ne’e ita distribui de’it ba Komandante Munisípiu sira, maibé ba Komandate Unidade sira, Komandu PNTL sei aluga tan karreta balun, nune’e bele apoiu diak liután serbisu operasionál iha atividade kampaña no eleisaun bele la’o di’ak liután,” nia akresenta.

PNTL garante seguransa 

Komisáriu Faustino da Costa, garante Polisia Nasionál Timor-Leste (PNTL) sei asegura kampaña no eleisaun Prezidensiál atu hala’o iha ámbitu hakmate no pás nia laran.

“Ha’u atu dehan maske PNTL iha dikuldade no dezafiu oin-oin, maibé Komandu sei tenta buka  apoia bele kompleta kestaun lojístika ba membru PNTL. Tanba liga kampaña no eleisaun 2022-2027   ejize nafatin atu asegura nune’e bele la’o  iha ambitu hakmatek nia laran no ha’u garante kampaña tinan ne’e sei la’o iha ambiente ne’ebé hakmatek,” Komandante PNTL ne’e garante.

Nune’e, Komandu PNTL husu ba Komandante Munisípiu sira hotu  atu mantein seguransa másimu durante kampaña no eleisaun, nune’e povu bele livre ezerse sira nian votu.

“Atu eleisaun ne’e la’o di’ak no seguru mak  depende ba ita hotu nian atendimentu iha tereñu  ka iha base.  Tanba ne’e husu komandu munisípiu sira atu ita  hotu nafatin esforsu hodi tau aas katak festa demokraásia ida ne’e festa ida ne’ebé ke tenke livre no justu, festa ida ne’ebé laiha intimidasaun, laiha ema ida obriga ema seluk ezerse sira nian direitu hanesan sidadaun,” nia fó hanoin.

Notísia relevante: PNTL hahú kapasita membru asegura kampaña no eleisaun Prezidensiál

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here