Kandidatu Prezidente Repúblika Independente 2022-2027, Luis Tilman. imajen/espesial

DILI, 16 fevereiru 2022 (TATOLI)— Supremu Tribunál ba Justisa (STJ) liuhosi Tribunál Rekursu indefere ka rezeita rekursu hosi kandidatu independente Prezidente Repúblika Luis Alves Tilman tanba la prenxe rekezitu, nune’e kandidatu ne’e la konkorre ona iha eleisaun prezidensiál ne’ebe realiza iha loron 19 marsu tinan ne’e.

Kandidatu Luis Tilman submete rekursu iha tersa (15/02), hafoin Tribunál Rekursu notifika la admitidu tanba kandidatu nia apoiante hosi munisípiu tolu hanesan Liquiça, Manufahi no Viqueque la to’o ema na’in-100 ne’ebé tuir lei haruka.

Notísia relevante: Seidauk prenxe rekezitu, Tribunál Rekursu la simu kandidatu Luis Tilman

Maske, iha rekursu ne’e kandidatu Prezidente Repúblika kompleta dokumentu kona-bá lista apoiante munisípiu tolu, hanesan Viqueque, Covalima no Liquiça ho eleitór 100-resin, maibé hafoin verifikasaun Tribunál Rekursu kontinua nota la prenxe rekezitu.

“Sira (Tribunál Rekursu), iha 14 fevereiru fó loron ida ba ami hodi submete fali rekursu hodi kompleta dokumentu hosi munisípiu tolu hanesan Viqueque, Manufahi no Liquica. Nune’e, Tersa (15/02), tuku 14:04, lokoraik ami submete fali ami nia dokumentu hodi kompleta, maibé ohin (16/2) sira (Tribunál Rekursu) halo notifisaun ba ami hodi kompleta tan dokumentu balun hanesan no halo tan karta alegasaun ba Tribunál, maibé ami la konsege. Tanba ne’e mak Tribunál konsidera ami kontinua la prenxe rekezitu,” Kandidatu PR Luis Tilman, hateten ba Agência Tatoli via telefónika, kuarta ne’e.

Notísia relevante:Kandidatu Luis Tilman hahú kompleta dokumentu iha Tribunál Rekursu

Nia dehan, maski Tribunál Rekursu indefere ka rezeita nia rekursu, maibé nuudar sidadaun simu desizaun ne’e.

“Hanesan kandidatu lamenta ho desizaun Tribunál foti la tuir norma no regra. Maibé laiha problema hanesan timór-oan ita nafatin kontinua respeitu ba desizaun Tribunál. Ha’u la partisipa iha festa demokrasia ne’e, maibé kontinua hanesan timór-oan kontinua kontribui ba prosesu dezenvolvimentu,” Luis Tilman afirma.

Aban, dada númeru sorteiu

Entretantu, Tribunál Rekursu, kuarta ne’e, tuku 17:00, lokoraik, hasai desizaun no anúnsia lista definetiva ba kandidatu Prezidente Repúblika na’in-16 mak admitidu hodi konkorre iha Eleisaun Prezidensiál ne’ebé sei realiza iha loron 19 marsu tinan ne’e.

Enkunatu, Parte Tribunál Rekursu mós komunika  kedan ona reprezentante ka ekipa susesu kandidatu Prezidente Repúblika sira atu, aban (17/02), tuku 10:00, dader , hahú dader númeru sorteiu

Kandidatu na’in-16 ne’ebé admitidu mak hanesan, kandidatu hosi partidu CNRT, José Manuel Ramos Horta, partidu KHUNTO, Armanda Berta dos Santos, partidu FRETILIN Francisco Guterres Lúo-Olo, hosi PD Mariano Asanami Sabino, Partidu Demokrátiku da Repúblika de Timor (PDRT) Anacleto Bento Ferreira.

Kandidatu independente kompostu hosi Felisberto Araújo Duarte, Milena Pires, Angela Freitas, Isabel Fereira, Hermes da Rosa Correia Barros, Lere Anan Timur, Rogério Tiago Lobato, Virgílio Guterres, Constâncio da Conceição Pinto,Antero Benedito da Silva no Martinho Germano Gusmão.

Notísia relevante: STJ hahú verifika dokumentu kandidatu Prezidente Repúblika na’in-17

Jornalista : Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here