Prezidente Tribunál Rekursu, Deolindo dos Santos. Imajen Tatoli /Francisco Sony

DILI, 14 fevereiru 2022 (TATOLI)— Tribunál Rekursu (TR), segunda ne’e, anúnsia rezultadu verifikasaun dokumentu ba Kandidatura Prezidente Repúblika 2022-2027 na’in-17, hosi númeru kandidatura ne’e na’in-16 admitidu (simu) no kandidatu Luis Tilman mak la admitidu (la simu) tanba seidauk prenxe rekezitu.

“Ita iha Kandidatu barak tebes, durante prosesu verifikasaun ita deteta irregularidade barak tebes, liu apoiante ba kandidatura la to’o no la prenxe kritériu, maibé Ita nian kandidatura koopera hodi kompleta. Nune’e hahú prosesu rejistrasaun to’o ohin, ita kandidatura kompleta hotu dokumentu. Maibé  iha   ida  mak la konsege konklui dokumentu mak ita nian kandidatura Prezidente Repúblika Luis Alves Tilman,” Prezidente Tribunál Rekursu, Deolindo dos Santos ba jornalista-sira bainhira anúnsiu rezultadu verifikasaun kandidatura PR 2022-2027 iha edifísiu TR-Caicoli.

Notísia relevante:   STJ hahú verifika dokumentu kandidatu Prezidente Repúblika na’in-17

Prezidente Deolindo ne’e esplika kandidatu Luis Tilman la admitidu tanba nia la prenxe kritériu liuliu haree kona-ba apoaiante ka proponente sira.

“Ita haree iha ba iha apoiante sira nian eleitorál la to’o tanba apoiante sira ne’ebé mak submete mai 5.000, maibé bainhira Tribunál Rekursu verifika apoiante munisipiu haat hansan Likisa, Manufahi, no Viqueque nia apoiante la to’o ema na’in-100 tuir lei haruka,” Deolindo esplika.

Maske nune’e, nia dehan Tribunál Rekursu sei fó tempu ba Kandidatu Luis Tilman atu hato’o rekursu hodi kompleta nia dokumentu.

“Ami fó prazu loron ida ba kandidatu atu kompleta nian dokumentu ho prazu aban no desizaun ba rekursu ne’e loron rua mak to’o kinta ne’e,” nia afirma.

Kandidatu na’in-16 ne’ebé admitidu mak hanesan, kandidatu hosi partidu CNRT, José Manuel Ramos Horta, partidu KHUNTO, Armanda Berta dos Santos, partidu FRETILIN Francisco Guterres Lúo-Olo, hosi PD Mariano Asanami Sabino, Partidu Demokratiku da Repúblika de Timor (PDRT) Anacleto Bento Ferreira.

Kandidatu independente kompostu hosi Felisberto Araújo Duarte, Milena Pires, Angela Freitas, Isabel Fereira, Hermes da Rosa Correia Barros, Lere Anan Timur, Rogério Tiago Lobato, Virgílio Guterres, Constâncio da Conceição Pinto,Antero Benedito da Silva no Martinho Germano Gusmão.

“Kuandu Ita laiha rekursu  to’o Kuarta (16/02), Ita hasai lista kandidatura definitiva hodi konvida reprezenta kandidatura mai  hodi dada númeru sorteiu ona, maibé ita iha rekursu hosi  kandidatura ne’ebé la admite ne’e , mak ha’u hanoin sesta ita bele dada númeru sorteiu,” nia afirma.

Luis Tilman garante kompleta dokumnetu

Entretantu, Kandidatu Prezidente Republika Luis Alves Tilman, hateten nia parte garante sei kompleta dokumentu tuir prazu ne’ebé Tribunál Rekursu fó.

Kandidatu Prezidente Republika , Luis Alves Tilman. Imajen/espesiál

“Ohin, desizaun Tribunál anunsia kandidatura sira ne’ebe admitidu no ida ne’ebé la admitidu mak ha’u, maibé ami garante, tersa aban (15/02), sei kompleta ami nian dokumentu tuir tempu ne’ebé tribunál fó,” Kandidatu PR ne’e garante.

Nune’e, nia dehan nuudar kandidatu PR no sidadaun tenke kumpre notifikasaun ne’ebé Supremu Tribunál ba Justisa liuhosi Tribunál rekursu fó ona.

Notísia relevante: STAE konklui ona verifika dokumentu kandidatu PR períodu 2022-2027

Jornalista : Natalino Costa.

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here