Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, lidera reuniaun Konsellu Ministru, iha Palásiu Governu, kuarta (16/02). Imajen TATOLI/Francisco Sony

DILI, 16 fevereiru 2022 (TATOLI)—Governu liuhosi reuniaun Konsellu Ministru (KM) aprova ona ho alterasaun, Projetu Rezolusaun ne’ebé aprezenta hosi Vise-Ministra Finansa, Sara Lobo Brites, hodi estabelese estrutura administrativa, ne’ebé sei responsável ba realizasaun Resenseamentu Jerál Populasaun no Abitasaun Timor-Leste tinan 2022 (Sensu Populasaun 2022).

“Rezolusaun Governu ne’e define sé mak integra ba kada komisaun tolu, hodi konstitui estrutura administrativa responsável ba realizasaun sensu tinan 2022,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.

Notísia relevante: Governu prevee millaun $3,1 atu atualiza Sensu Populasaun iha setembru 2022

Komisaun tolu ne’e kompostu hosi Komisaun Nasionál, ne’ebé hanesan iha misaun orientasaun polítika no administrativa hosi atividade sensitária, inklui mobilizasaun rekursu umanu no materiál nesesáriu sira.

Aleinde ne’e, Komisaun Téknika, ne’ebé sei halo avaliasaun téknika ba atividade sensitária, revizaun instrumentu sensitária no rekomendasaun prátika di’ak ba rekolla no tratamentu dadus.

Nune’e mós, Komisaun Publisitasaun ne’ebé sei responsabiliza informa no prepara públiku jerál ba atividade sensitária.

“Resensiamentu Jerál Populasaun no Abitasaun ne’e mai ho objetivu prinsipál ba kontajen no karakterizasaun populasaun ne’ebé rezidente iha Timor-Leste, nune’e mós levantamentu ba alojamentu ne’ebé eziste no ninia kondisaun abitalidade, mediante hodi rekolla ezaustiva elementu no dadus, ne’ebé realiza hosi meiu operasaun inkéritu no tratamentu estatístiku nian,” Ministru esplika.

Governu prevee ona orsamentu millaun $3,1 ba realizasaun Sensu Populasaun 2022, ne’ebé sei realiza hahú 06 setembru to’o 06 outubru 2022.

Governu antes ne’e realiza ona Sensu Populasaun iha tinan 2004, 2010, ikus liu iha 2015, enkuantu iha tinan 2019 realiza Sensu Agríkola.

Notísia relevante: Sensu agríkola 2019: propriedade agríkola família boot liu maka Bobonaro

Rezultadu sensu populasaun 2015, totál populasaun Timor-Leste hamutuk 1.167.242, ne’ebé kompostu hosi mane hamutuk 588.561 no feto 578.681, sensu 2010 rejista populasaun hamutuk 1.066.409, mane iha 544.198 no feto 522,.242, ne’ebé hatudu katak durante tinan-lima nia laran populasaun aumenta 100.833.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here