Hare iha Atabae. Imajen Tatoli/António Gonçalves

DILI, 12 outubru 2020 (TATOLI)—Liuhosi reuniaun Konsellu Ministru (KM) estraordinária iha segunda ne’e, Vise-Ministra Finansa, Sara Lobo Brites, aprezenta relatóriu sensu agríkola 2019 nian.

Ministru Koordenadór Asuntu Ekonómiku, Joaquim Amaral, hateten relatóriu ne’e hatudu katak porsentu 60 agregadu familiár nasionál halo atividade agrikultura no propriedade agríkola okupa estensaun ektare 219.250.

“Munisípiu ho área propriedade agríkola família boot liu maka Bobonaro ho propriedade ektare 41.000 resin, Ermera ho ektare 40.000 resin no Baucau ho propriedade 25.000 resin, enkuantu munisípiu sira ne’ebé área agríkola menus liu maka Lautém ektare 8.555 no Manatuto ektare 3.371,” dehan Ministru Joaquim, hafoin reuniaun ezekutivu, iha Palásiu Governu.

Rezultadu ne’e hatudu katak iha 141.738 propriedade agríkola, ne’ebé 141.141 maka pertense ba propriedade familiár no  597 ba instituisaun privada sira.

Notísia Relevante: Relatóriu Sensu Agríkola: Porsentu 66 Uma-Kain iha Timor-Leste Halo Atividade Agrikultura

Tuir governante ne’e, liuhosi dadus ne’ebé rekolla ona iha setór agrikultura, bele ajuda Governu defini polítika iha setór agrikultura.

“Sensu ne’e rekolla dadus hosi setór agrikultura ho objetivu atu fó dalan ba definisaun polítika no estratéjika ba setór ne’e, atu apoia programa nasionál agrikultura hosi Planu Estratéjiku Dezenvolvimentu Nasionál (PEDN) 2011-2030,” nia akresenta.

Nune’e mós, sensu ne’e dezenvolve indikadór Objetivu Dezenvolvimentu Sustentavel (ODS 2), mensiona zero hamlaha no agrikultura sustentável, ne’ebé fornese dadus estatístiku kona-ba setór agrikultura iha nível suku no fornese enkuadramentu nasionál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here