Brigadeiru Jenerál Calisto dos Santos Coli “Coliati” ho nia espoza Lucia de Jesus Martins. Imajen Tatoli/António Gonçalves

DILI, 14 fevereiru 2022 (TATOLI)—Prezidente Republika, Francisco Guterres Lú Olo, tersa (15/02/2022) aban, sei fó pose Brigadeiru Jenerál Calisto dos Santos Coli “Coliati” hodi sai hanesan Vise Xefe Estadu Maiór Jenerál Forsa Armada no ba Komodoro Donaciano Costa Gomes Pedro “Klamar Fuik” hodi asume knaar hanesan Xefe Estadu Maiór Forsa Armada.

Notísia Relevante: Coliati, hosi soldadu brigada choque to’o Brigadeiru Jenerál

Tuir komunikadu ne’ebé Agéncia Tatoli asesu, segunda ne’e haktuir serimonia ne’ebé sei realiza tuku 10:00 Otl, iha Palásiu Prezidénsial Nicolau Lobato ne’e, sei promove mós deviza Brigadeiru Jenerál Calisto dos Santos Coli “Coliati” ba Majór Janerál, enkuantu Komodoro Pedro Klamar Fuik mantein nafatin ho deviza atuál, ne’ebé permite ona nia atu asume knaar hanesan Xefe Estadu Maior Forsa Armada.

Tuir Lei Defeza Nasionál, Vise Xefe Estadu Maiór Jenerál Forsa Armada no Xefe Estadu Maiór Forsa Armada, nomeia hosi Prezidente Repúblika tuir proposta Governu ne’ebé antes rona uluk Konsellu Superiór Defeza Militár no Konsellu Superiór Defeza Seguransa, liuhosi membru Governu ne’ebé iha kompeténsia ba matéria defeza.

Vise Xefe Estadu Maiór Jenerál Forsa Armadas foun, Brigadeiru Calisto Coli “Coliati”, ne’ebé moris iha Darulete, Liquiça, tinan 62 liuba, antes ne’e asume knaar hanesan Xefe Estadu Maior Forsa Armada no iha mós esperiénsia nu’udar Adidu Defeza Timor-Leste iha Austrália, hosi 2014 to’o 2018.

Enkuantu Komodoro Donaciano Costa Gomes “Pedro Klamar Fuik”, moris iha Hatulia, Ermera tinan-53 liuba, iha tinan-10 ikus, hala’o knaar nu’udar Diretór Institutu Defeza Nasionál Timor-Leste.

Komodoro Pedro Klamar Fuik mós iha esperiénsia lidera Komponente Navál FALINTIL-Firsa Defeza Timor-Leste (F-FDTL) husi 2008 to’o 2011.

Notísia Relevante: Jornada Pedro Klamar Fuik ho postu Komodoro

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here