Komodoro Donaciano Costa Gomes Pedro “Klamar Fuik, halo kontinénsia iha serimonia promosaun postu ofisiál jenerál no jenerais iha Palásiu Prezidente, Dili, sesta (26/02/2021). Imajen Tatoli/António Gonçalves

DILI, 01 marsu 2021 (TATOLI) – Ita ho ita rasik nunka hatene oinsá ita rasik nia futuru. Bainhira to’o ona otas adultu (dewasa), foin hakfodak katak ha’u iha ona servisu ho postura ida-ne’e. Ita lahatene ida-ne’e mak ita ida-idak nia hakarak ka la’ós karik.

Ba ema hotu ne’ebé hili dalan  iha vida militár no sai soldadu militár ne’ebé dedikadu nunka hatene kolen no sura-kolen. Servisu ho dedikasaun, lealdade, integridade no laran-luak ka laran-maus, sai hanesan aliserse  ida ba harii fundasaun karaterístika ema militár sira nian ho prósperu iha karreira.

Donaciano Costa Gomes Pedro “Klamar Fuik”, nu’udar ezemplár ida hosi jerasaun foun iha vida militár iha Instituisaun FALINTIL-Forsa Defeza Timor-Leste nian.

Notísia Relevante : Lere: “Sai komandante di’ak presiza lealdade, onestidade no unidade”

Prezidente Repúblika, Francisco Guterres “Lú Olo” tula postu Komodoro ba Donaciano Costa Gomes Pedro “Klamar Fuik”. Imajen Tatoli/António Gonçalves

Pedro Klamar Fuik, ne’ebé durante ne’e koñesidu ho títulu Kapitaun Mar-de-e –Guerra, sesta (26/02/2021), simu fiar no knaar todan hosi Estadu liuhosi desizaun Prezidente Repúblika, Francisco Guterres “Lú Olo”, ba postu Komodoro.

Postu Komodoro ne’e ekivalente ho Brigadeiru Jenerál. Normálmente títulu  Komodoro ne’e pertense ba Komandante ho diviza fitun ida iha Komponente Naval sira no ba Komponente Infantaria maka Brigadeiru Jenerál ho diviza fitun ida mós.

Hamutuk ho nia Komandante  FALINTIL  iha faze guerilla nian, Tito da Costa Critovão “Lere Anan Timur”, Komandante FALINTIL Domingos Raul “Falur Rate Laek”, ho nia maun-alin otas ida Calisto Santos Coli “Coliati”, sesta  liubá, perante públiku nia futar matan, simu promosaun no responsabilidade Estadu  ba postu ofisiál jenerál no jenerais bazeia ba Estatutu Militár  F-FDTL foun, ne’ebé aprova liuhosi dekretu – Lei  númeru 33/2020/ 2 setembru.

Notísia Relevante : Prezidente Repúblika halo promosaun ba postu ofisiál jenerál-jenerais

Prezidente Repúblika, Francisco Guterres “Lú Olo” taka xapeu postu Komodoro ba Donaciano Costa Gomes Pedro “Klamar Fuik”. Imajen Tatoli/António Gonçalves

Iha serimónia “sagrada” militár nian ne’ebé hala’o iha Palásiu Prezidénsia, Ai-tarak Laran, Dili,  Maiór  Jenerál  Tito da Costa Cristovão Lere Anan Timor  promove ba  Tenente Jenerál (Fitun tolu), Brigadeiru Jenerál  Domingos Raul  “Falur Rate Laek” promove ba Postu Maiór Jenerál (Fitun rua), Koronél Calisto Santos Coli  “Coliati” ba Postu Brigadeiru Jenerál  (Fitun ida) ho Kapitaun Mar-de-e –Guerra Pedro Klamar Fuik promove ba postu Komodoro (Fitun ida)

Koñese Pedro Klamar Fuik

Donaciano Costa Gomes Pedro “Klamar Fuik” hanesan ofisiál FALINTIL-Forsa Defeza Timor-Leste (F-FDTL) ne’ebé dezde tinan 2012 hetan fiar hosi Estadu hodi asume postu nu’udar Diretór ba Institutu Defeza Nasionál (IDN) no iha tinan kotuk 2020, Sala Situasaun Sentru Integradu Jestaun Krize (CIGC) nomea Klamar Fuik hanesan portavós CIGC nian hodi fó sai informasaun ofisiál hosi Governu kona-ba situasaun pandemia COVID-19.

Diretór Institutu Defeza Nasionál Timor-Leste (IDN-TL), Donaciano Costa Gomes “Pedro Klamar Fuik”, ne’ebé promove ona ba postu Komodoro. Imajen Tatoli/Egas Cristóvão

Biografia badak Klamar Fuik nian ne’ebé haktuir iha dokumentu ofisiál IDN-TL, katak Pedro Klamar Fuik nu’udar estudante no juventude jerasaun frente klandestina ne’ebé hola parte ligasaun direta luta frente armada nian iha vila-laran.

Iha 10 outubru  1989, Klamar Fuik hamutuk ho nia kolega juventude loriku asua’in lubun halo manifestasaun iha Tasi-Tolu, Dili, iha ámbitu vizita Sua Santidade Papa João Paulo II mai Timor-Timur (Timtim) bainhira sei sai hanesan provínsia da-27 ba NKRI (Negara Kesatuan Republik Indonesia).

Informasaun hosi ibun ba ibun to’o militár Indonéziu ka ABRI (Angkatan Bersenjata Republik Indonesia) sira-nia liman no tilun katak Pedro Kalmar Fuik mós autór ida iha manifestasaun ne’e no iha relasaun besik liu ho GPK (gerakan pengacau kemaanan) FRETILIN no sai saseluk FRETILIN nian iha vila-laran.

Moris iha persegidu nia-laran, ikus mai ho orientasaun hosi Kay Rala Xanana Gusmão, nu’udar Komandante Em-Xefe FALINTIL, Pedro Klamar Fuik, halai sai hosi Timor-Timur ba rai-li’ur Portugal ho Austrália.

Fila mai Timor-Leste,  Klamar Fuik sai hanesan ofisiál iha F-FDTL no ho ofisiál F-FDTL sira seluk, Klamar Fuik enfrenta estudu iha Instituto de Estudos Superiores Militares iha Portugal no partisipa mós iha formasaun balun iha Austrália.

Ho nia koñesimentu intelektuál, dedikasaun, disiplina no prestasaun servisu iha vida militár nian, Klamar Fuik mós hetan fiar hodi okupa postu prinsipál no estratéjiku iha F-FDTL nian, kompostu hosi Xefe ba Sentru Treinamentu F-FDTL iha Aileu, Diretór Operasaun Sentru Instrusaun Prezidente Nicolau Lobato, Metinaro, Koordenadór ba hakerek livru mutin Planu Estratéjiku “Defeza 2020” no nu’udar mós Konselleiru  Militár Prezidente Repúblika.

Karreira profisionál Klamar Fuik nian tinan ba tinan evolui maka’as tuir ritmu no nesesidade F-FDTL no Estadu nian, nune’e nia mós promove ba Komandante Naval no iha loron 14 janeiru 2010, nia simu diviza hanesan Kapitaun  Naval.

Iha fali  loron 3 maiu 2012, Klamar Fuik simu knar foun hanesan Diretór Instituto de Defesa Nacional (IDN)  no komesa hosi Novembru 2012 nia sai hanesan konsultóriu ba misaun ONU nian iha Guinea-Bissau no remata misaun ne’e nia fila-fali mai IDN-TL.

“Promosaun ne’e reprezenta eroi hirak ne’ebé mate ba rai-ne’e atu kontinua tulun Timoroan sira harii Estadu ho susesu liután ba futuru,” Komodoro Donaciano Costa Gomes Pedro “Klamar Fuik” lia tun ba funsionáriu sira iha IDN-TL ne’ebé sita iha komunikadu imprensa  IDN-TL nian ba Agência Tatoli, segunda ne’e.

Klamar Fuik  konsidera promosaun diviza Komodoro ne’ebé nia simu nu’udar orgullu koletivu ida ne’ebé reprezenta Estadu Timor-Leste no eroi sira ne’ebé luta mate ba rai ida-ne’e.

Esperiénsia profisionál

  1. Iha tinan 2008-2011, Pedro Klamar Fuik, sai hanesan komandante komponente Naval Timor Leste.
  2. Iha tinan 2005-2006 assumi kargu hanesan konselleiru Militar ba Prezidente da Repúblika Demokrátika Timor – Leste.
  3. Iha tinan 2004 to’o 2006 hanesan koordenadór ba ekipa servisu hakerek livru mutin ba Defeza Nasionál Timor -Leste “Planu Estratéjiku Defeza 2020”.
  4. Tinan 2003- 2004 sai hanesan Komandante Sentru Instrusaun Militár Komandante Nicolau Lobato.
  5. Iha 2002 – 2003 sai hanesan Chefe Operasaun ba Quartel-General F-FDTL.
  6. Iha periodu transitório ba restaurasaun Independénsia Nasionál hosi tinan 2000 – 2002, dezempeña nia funsaun hanesan ofisiál ligasaun FALINTIL ba Forsas Internasionaís ONU iha Timor Leste (INTERFET) no posteriormente Forsas Manutensaun Paz ba ONU.
  7. Iha tinan 2001, nomeia ba hanesan reprezentante FALINTIL hamutuk ho ekipa Kings College a Concéção no estabelesimentu iha organizasaun Militár Timor-Leste.
  8. Iha periodu 1997 – 2000, hala’o mós nia funsaun seluk ne’ebé relevánsia militaria no nomea ba komandu operasionál FALINTIL mós kolabora Estadu Maiór ba asuntu operasaun espesiál
  9. Desde tinan 1990- 1996 iha diáspora, Klamar Fuik, integra mós iha atividade Frente diplomata ho baze iha Portugal no Austrália hodi apoiu no reforsa ba Frente Armada.
  10. Antes exilar ba Portugal, Klamar Fuik mós sai segundu vise sekretaria ba komité ezekutivu iha Frente Klandestina ba CNRN to’o final iha tinan 1999, no membru ativu fundador ba OJECTIL desde tinan 1985.
  1. Iha tinan 2014, konklui mestradu ba estudo reziliénsia no estratéjia iha Institutu Defesa Nasionál (LEMHANAS) Indonézia no iha tinan 2015 konklui mestrado ba Gestão portuaria husi Institutu Siénsia Informasaun no Administrasaun, Aveiro.

Oras ne’e daudaun, Klamar Fuik ne’ebé moris iha Postu Administrativu Hatulia, Munisípiu Ermera, iha loron 24  Maiu 1968, doutorando iha estudu estratéjiku ba Institutu Superiór Siénsia Sosiál no Polítiku  iha Universidade Lisboa,  Portugal.

Jornalista   : Eugénio Pereira

Editór        : Francisco Simões

1 KOMENTÁRIU

  1. Parabens ba senhor Donaciano Costa Gomes Pedro ” Klamar Fuik ” nb hetan promosaun ba Postu Comodoro ka ekivalente Brigadeiro General (fitun Ida) e ms parabens ba dedikasaun nb diciplinado no hatudu simplicidade tebes iha povo Nia matan, bom trabalho com muito susesu no futuru, parabens

HAKEREK NO HATÁN

Please enter your comment!
Please enter your name here