Artista Maria Vitoria "Marvi" hala'o lansamentu primeiru single hosi ho titulu Iluzaun. Iha Hotel El Legendario Dili, sesta (11/02). Imajen Tatoli/Francisco Sony

DILI, 11 fevereiru 2022 (TATOLI)—Kle’ur la mosu, ohin MARVI mosu ho knananuk domin nian ida be nakonu ho mehi. Tinan neen (6) la rona MARVI nia lian, ohin MARVI liki surik domin ka ninia múzika single dahuluk “Iluzaun” hodi soe ba públiku iha sesta, odan 11 fevereiru 2022.

Notísia Relevante: UNICEF Estende Kontratu ho Marvi Nu’udar Advogada ba Foin-sa’e

Artista Maria Vitoria “Marvi” hala’o lansamentu primeiru single hosi ho titulu Iluzaun. Iha Hotel El Legendario Dili, sesta (11/02). Imajen Tatoli/Francisco Sony

“Ha’u hakarak espresa sentimentu ksolok ne’ebé labele deskreve ho liafuan, tanba loron ne’e mak loron ne’ebé ha’u hein durante tinan neen (6) nia laran. Ho grasa Na’i Maromak nian no tulun hosi ema di’ak lubuk ida, ohin ha’u bele lansa ha’u-nia múzika (single) dahuluk ho nia títulu “ILUZAUN,” Kantora Timor-Oan Vensedora The Voice Portugal (2019), Maria Vitória “MARVI” hateten ba jornalista sira liuhosi Konferénsia Imprensa, ne’ebé realiza iha El Legendario, Hotel Novo Turismu, Dili, sesta ne’e.

Durante tinan ne’e, MARVI lakonsege prodús múzika tanba de’it hakesi kontratu ho The Voice Portugál atu prodús single nu’udar vensedora ba The Voice Portugal maibe to’o kontratu ne’e finaliza kompañia Universál Muzika Portugal la konsege realiza mehi ne’e.

 “Hanesan imi hatene, durante tinan neen (6) ne’e ha’u la konsege hasai ha’u-nia múzika rasik,  la’ós ha’u lakohi maibé iha kondisaun no razaun balun ne’ebé la fó dalan duni atu halo single rasik. Razaun boot ida mak bainhira partisipa iha The Voice Portugál iha tinan 2018, partisipante hotu, inklui ha’u asina kontratu ida katak The Voice Portugál mak sei prodús single no múzika ba manan-na’in no ami próibidu atu hasai single rasik. Tanba ha’u mak sai manan-na’in ba The Voice Portugál iha tinan 2018, entaun ha’u no ha’u-nia jerente tenke kumpre kontratu. Nune’e, ami konsege halo komunikasaun ho Universál Múzika Portugál atu dieskute hamutuk konaba produsaun múzika ne’e, maibé to’o kontratu ne’e ramata iha tinan 2020 mós, ha’u seidauk hetan single ne’e. Ha’u lakohi ko’alia kle’an iha sesaun konferénsia imprensa ne’e, karik sira mós iha sira-nia razaun rasik,” nia dehan.

Hirak ne’e hotu sai hanesan lisaun id aba MARVI atu aprende no sai maduru. Maibé, hafoin liu tiha laloran moris ida-ne’e, MARVI ninia karreira iha mundu múzika la suli hanesan bee tuir bee-dalan hodi hetan susesu, maibé moris ne’e suli hodi sidi iha pandemia COVID19 ne’ebé sai mós razaun ida atu MARVI labele prodús ninia single, maske kontratu ho The Voice Portugal termina tiha ona.

Artista Maria Vitoria “Marvi” hala’o lansamentu primeiru single hosi ho titulu Iluzaun. Iha Hotel El Legendario Dili, sesta (11/02). Imajen Tatoli/Francisco Sony

“Ha’u konsidera ne’e la’ós fallansu maibé prosesu ida atu halo ha’u aprende barak liután, hodi bele sai maduru. Ba buat sira-ne’ebé akontese, ha’u la dezanima, maske ha’u simu netizen sira-nia liafuan kro’at, katak ha’u ne’e kantora ne’ebé laiha múzika rasik no kantora ne’ebé hatene cover de’it ema seluk nia múzika. Ha’u hatene, konsekuénsia sai figura públiku mak ida-ne’e no ha’u espera liuhosi konferénsia imprensa ne’e, maluk sira bele hatene razaun tanbasá durante tinan barak ne’e ha’u seida’uk hasai single múzika no só bele hananu múzika ema seluk nian. Liuhosi ne’e, ha’u agradese no ha’u kontinua fiar katak loron ida ha’u sei bele prodúS ha’u-nia múzika rasik no loron ohin to’o mai duni ona,” Soibada-oan ne’ebé naran famoza iha Acedemy Dangdut Asia-2 iha Indosiar ne’e hateten ho oin kontente.

Notísia Relevante: Marvi Hetan Kontratu Hosi Portugal

Laureadu Nobel da Paz, José Manuel Ramos Horta, sente kontente ho lansamentu múzika dahuluk Marvi nia ne’e no konsidera Maria Vitória “Marvi” sai hanesan “Estrela’ ka “Fitun” ida-ne’ebé iha TimorLeste no mundu.

“Ba Marvi ha’u la ko’alia naruk, hanesan ha’u hateten primeira vez koñese. Depois, foin daudaun ko’alia ho Marvi, nia fó hanoin fali ba ha’u, momentu nia hateten loron ida itaboot tula ami labarik sira iha itania karreta kiik ne’e lori ami ba almoco, hosi ne’e ha’u la lembra tan ona. Tanba katuas daudaun, ita haluha buat barak no ha’u kontente tanbá ita hotu iha ne’e. Nune’e, ba ha’u maske ohin iha buat seluk karik, maibé ida ne’e prioridade ida ba itania estrela ida-ne’e, ne’ebé parabéns no hakuak boot ba Marvi,” José Ramos Horta hateten.

Iha biban na’e, nia konta, iha 2012 iha Jardim Boot ida iha ne’ebá nia deside halo eskola espesiál ida iha jardim laran ba labarik sira ki’ak, hosi ne’e labarik sira hotu mai eskola iha ne’ebá, no nia fó apoiu ba labarik sira-ne’e no nia lembra labarik feto ida mak kanta múzika despedida nian ba nia iha 2012.

Yes I Do Events raliza konferénsia imprensa relasiona ho lansamentu primeiru single hosi artista Marvi ho titulu Iluzaun. Iha Hotel Novu Turismu, sesta (11/02). Imajen Tatoli/Francisco Sony

“Bainhira ha’u sees aan nu’udar Prezidente Repúblika, labarik oan feto ida hatais di’ak loos mak kanta kansaun despedida. Nune’e iha tinan lubuk ida liu ha’u ba iha Lisboa hasoru Marvi iha Embaixada Timor nian iha ne’ebá, entaun Marvi fó lembra ba ha’u, nia mak labarik oan ne’ebé kanta ba ha’u iha 2012. Nune’e, hosi kotuk, tanba buat ne’e show importante ida iha Portugál ho opiniaun públika vota, entaun ha’u hosi kotuk telefone ba Sekretáriu Jerál António Guterres iha Nova Iorke, Sekretáriu Jerál ko’alia ba nia espoza no Veradóra Sekretária ba Kultura iha Portugál atu haree oinsá mobiliza oponiaun públika atu vota ba Marvi, entaun ha’u mete tan Sekretáriu Jerál ONU ni’an iha kansaun,” Ramos Horta konta tuir.

Maria Vitória nia aman, António Borges, sente kontente no agradese ba Maromak tanba ho Nia tulun mak Marvi bele halo ona nia múzika rasik.

“Ha’u agradese ba Maromak, ba grasa tomak ne’ebé haraik ba Marvi, nia hein no ha’u mós hein durante tinan hirak nia laran, maske nia ba tuir kompetisaun dala hira iha Jakarta, bainhira hotu nia mai ba tuir tan The Voice Portugál fila mai to’o agora seida’uk bele realiza ninia single dahuluk, tanba situasuan la dun favoravél ba nia. Maibé ohin nia bele lansa ona nia múzika dahuluk, ne’ebé agradese ba nia manejer tanba bele buka meiu to’o ohin loron nia bele realiza nia múzika dahuluk,” António Borges afirma.

Ho lansamentu múzika dahuluk ba Vensedora The Voice Portugál ne’e, António Borges, esperansa ba oin karik Marvi iha tempu admite nia bele halo tan ninia múzika tuir mai.

Entretantu, iha lansamentu múzika ho titlu “Iluzasuan” ne’e hetan apoia hahú iha produsaun múzika, vídeo Clip to’o eventu lansamentu ne’e realiza mak, José Ramos Horta, Jorge Serrano, Novo Turismo, El-Legendario, GMN-TV, Perissos, FoneHaus, Nike TL Sports, Hau Timor, Flodova Farma, Fundação Cristal, Timor Telecom, Telkomcel, East Timor Trading + Yellow Tail, Zeal Unipessoal, Lda, Bintang, Limos, Timor Furak, Klan, NT Tekstile, Rui Collection, Elizabeth House of Beauty, Jilo Exposto Fabs Nail and Beauty no ACCCTO. Enkuantu, múzika ho titlu Ilusaun ne’e hakerek hosi Jimmy no Jessica, ho nia durasaun minutu tolu (3).

Liuhosu múzika no liuhosi MARVI nia moris realidade, dalaruma múzika single ho topiku “ILUZAUN” ne’e mak sasin hodi hasasin MARVI nia moris ho múzika ne’e ninia liafuan reffraun ne’e:

Karik ha’u hetan nia

Ha’u sorte tebes

Se nia la’ós realidade

Ha’u-nia moris kontinua…

Notísia Relevante: 24 Jullu, Maria Vitória Kompete Iha The Voice Portugal

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here