DILI, (TATOLI) – Vensedora The Voice Portugal, Maria Vitória ka Marvi hetan ona kontratu hosi kompañia universál The Voice Portugal durante tinan rua ho obrigatóriu tenke prodús album múzika mesak nomos hala’o konsertu iha nasaun Portugal tuir oráriu ne’ebé maka sei estabelese hosi kompañia refere.
“Portugal nian la apoiu bolsu estudu maibé iha kontratu tinan rua ba servisu ne’ebé ha’u tenke halo produsaun album, konsertu muzika iha portugal”, hatete Marvi ba jornalista sira iha salaun Arte Gembel Lecidera, ohin.
Liuhosi konferénsia imprensa, Marvi mós anúnsia jestora foun, Jessica Kawengian, ne’ebé troka ona jestora sesante, Ana Gomes. Ana hahú kontratu 2016 to’o 2018.
Jestora foun, Jessica Kawengian, hanesan mós artista timoroan no ekipa inisiadór programa Jovens Super Star (JSS) Dioseze Dili iha tinan hirak kotuk.
Ba programa bolsu estudu hosi parte Timor-Leste liuhosi Governu no eis Primeiru-Ministru no eis Prezidente Repúblika, Kay Rala Xanana Gusmão, deklara ona sei oferese bolsu estudu ba kantora ho idade 17 ne’e iha futuru, mesmu oras ne’e iha hela prosesu diskusaun ba implementasaun.
Tuir Marvi nu’udar alumni Dangdut Akademia Ázia segundu Indosiar iha Indonézia tinan 2016 ne’e hatete jestor foun ne’e ho kontratu tinan ida sei hala’o knaar atu jere no foti desizaun ba atividade tomak, liliu iha mundu artista iha rai-laran no estranjeiru.
Alende ne’e sei koopera ho Asosiasaun Múzika Timor-Leste (ALMAMOR) Timor-Leste hodi hakerek karta ofisiál ba universál The Voice Portugal kona-ba termina kontratu ho jestora sesante no aprezenta jestora foun atu koopera di’ak liután durante kontratu la’o.
Nune’e mós knaar seluk ida hosi jestora ne’e maka akompaña prosesu produsaun album dahuluk no atividade konsertu hafoin lansamentu album refere, inklui konsulta oráriu no atividade atu halo konsertu iha Portugal baea ba kontratu ho kompañia portuguesa ne’e.
“Oras ne’e halo hela produsaun ba album dahuluk, espera buat hotu bele la’o di’ak liuhosi ha’u nia jestóra foun, depois produsaun album sei iha konsertu hodi halo lansamentu ba ha’u nia album”, tenik tan.
Nia reforsa liután album foun ne’e ho jenre oin-oin, ho lian-tetum ho tema intersante bazea ba evolusaun ne’ebé akontese iha rai-laran no mundu.
“Jestora foun ne’e sei fasilita ha’u nia atividade nu’udar artista iha rai-laran no rai-liur, maibé atan ha’u hakarak hato’o agaresementu wain ba jestora sesante, Ana Gomes, ne’ebe ha’u bolu Mimí no nia família tomak durante ne’e oferese nia án tomak hodi servisu hamutuk ho ha’u, liuliu ho ha’u nia susesu tomak iha The Voice Portugal tanba nia servisu”, dehan tan.
Ambisaun seluk ida ne’ebé mosu hosi artista timoroan ne’e maka planu partisipa iha The Voice Amérika iha futuru. Save ba susesu maka tenke aprende maka’as, orasaun, haraik án no agradese ba Maromak.
Tuir planu Marvi ho ekipa kompostu hosi Almamor, Konsellu Nasionál Juventude Timor-Leste (CNJTL-sigla portugés), artista timoroan sei halo visita ba instituisaun Estadu sira, Governu hodi agradese ba apoiu morál no materíal durante partisipa The Voice Portugal iha 2018.
Agradese mós ba Xanana Gusmão, Fundasaun Quesadhip Ruak, Timor Plaza, Dellos no kompañia seluk ne’ebé fó ona apoiu inklui Mentora Portuguesa, Marissa Liz.
Jornalista: Agapito dos Santos
Editora: Rita Almeida
Lolos ne’e marvi tem que continua kontrata tan lai Gestora Ana Gomes ne’e ho nia familia tomak apoio no facilita marvi to’o sai vencedora do The Voice Portugal. Tinan rua ka tolu tan mak bele buka Gestora foun seluk. Abraco
Troca di’ak ona maibé, nia problema bo’ot ida mak Língua Portuguesa!!! 🤔 sera que a nova gestora da Marvi fala bem português? Tamba iha portugal tô Nebe di’ak liu kontinua lai ho Ana Gomes, depois liu tiha tinan rua mak troka ba Jessica K.
Ho lai Ana Gomes para bele facilita Marvi di’ak liu iha Parte língua portuguesa e mos comunicação durante tinan rua no atividade halo album iha Portugal.! Tamba Ana Gomes kolia português.
Bom sucesso ba Marvi e a sua nova Gestora. 🙏😍