CNE husu kandidatu PR atu labele insulta malu iha tempu kampaña
DILI, 11 fevereiru 2022 (TATOLI)—Vise-Prezidente Komisaun Nasionál Eleisaun (CNE, sigla portgés), Domingos Barreto, husu CNE husu kandidatu Prezidente Repúblika atu labele insulta malu iha tempu kampaña.
Notísia Relevante: Órgaun eleitorál tenke foti sansaun hasoru kandidatu PR viola regra
“Espera katak kandidatu sira labele insulta malu tanba ema ida atu sai kandidatu konserteja tenke hatudu ninia figura ida ne’ebé di’ak. Se nia insulta malu ne’e mós sei iha prosedimentu. CNE sei toma medida atu prevene iha tempu ida, loron 2 to’o loron 16 halo kampaña ne’e atu evita problema sira-ne’e labele mosu,” Domingos Barreto hateten ba jornalista sira hafoin tuir dialogu kona-ba “Sansaun no penalti ba aktu irregularidade ne’ebé komete hosi kandidatu PR iha ámbitu kampaña eleisaun Prezidente Repúblika” iha salaun Auditoriu CNE, Dili, sesta ne’e.
Nune’e, antes aru tama loro marsu atu halo kampaña eleitorál, sei bele halo preparasaun no koordenasaun ida ne’ebé di’akliu atu nune’e bele Evita problema mosu.
Krime eleitorál ne’ebé ko’alia kona-ba ema halo impedimentu ruma ka perturba aktu saida de’it, aktu ne’ebé halo iha tempu ida kampaña eleitorál, tempu ida votasaun ida-ne’e regula hotu nia kodigu penál.
“Ita iha regulamnetu balun no Dekretu Governu fó sai, ita mós iha ita-nia kódigu penál iha artigu 229 to’o artigu 243 ne’e ko’alia kona-ba krime eleitorál sira,” nia dehan.
Notísia Relevante: STAE konklui ona verifika dokumentu kandidatu PR períodu 2022-2027
Antes ne’e, Komandante Jerál Polisia Nasionál Timor-Leste (PNTL), Komisáriu Faustino da Costa, informa, Komandu PNTL hahú fó kapasitasaun iha área lei ba membru sira atu preparadu hodi asegura atividade kampaña no Eleisaun Prezidensiál ne’ebé sei akontese iha tinan ne’e.
“Ita preparadu asegura atividade kampaña no Eleisaun Prezidesiál, nune’e ita fó hela kapasitasaun ba membru polisia iha área lei ka lejizlasaun oinsá atu ita nia polisia sira atua seguransa karik mosu buat ruma iha kampaña no Eleisaun Prezidensiál,” Komisáriu ne’e hateten.
Komandu PNTL mós aprezenta ona ba Xefe Governu kona-ba transporte operasionál ne’ebé ajuda fasilita membru PNTL hodi asegura kampaña no Eleisaun Prezidensiál ne’e.
Tanba rezolusaun Governu númeru 130/2021 hateten hahú hosi tinan 2022 ba oin laiha alokasaun orsamentu iha kategoria kapitál menór hodi sosa ka kompra viatura.
“Maske nune’e hafoin halo diskusaun ho Primeiru-Ministru nuudar Ministru Interiór no Vise Ministru Interiór haree iha duni nesesidade ba instituisaun PNTL atu halo akizisaun ba viatura operasionál atu asegura kampaña no eleisaun. Nune’e, ami hein desizaun hosi Governu,” nia dehan.
Notísia Relevante: Tribunál Rekursu simu lista kandidatura PR to’o 04 fevereiru
Jornalista : Osória Marques
Editór : Cancio Xiemenes
