Kandidatu Prezidente Republika,Virgílio da Silva Guterres. Imajen Tatoli/Francisco Sony.

DILI, 11 fevereiru 2022 (TATOLI)—Kandidatu Prezidente Repúblika (PR) 2022-2027, Virgílio Guterres, hateten órgaun eleitorál tenke foti sansaun hasoru kandidatu partidu boot bainhira viola regra ruma.

“Kestaun ne’ebé sai preokupasaun ba ha’u mak korajen órgaun eleitorál sira atu foti sansaun ba ita hotu kandidatu Prezidente Repúblika sira foun no tuan sira, la’ós tuan de’it maibé hanesan kandidatura PR José Ramos Horta ho pezu ne’ebé boot tanba hetan apoiu hosi partidu boot hotu. Entaun órgaun eleitorál brani foti medida ka lae hasoru kandidatura PR bainhira liafuan ruma akuza ka viola regra ruma,” Virgílio Guterres hateten iha dialogu kona-ba “Sansaun no penalti ba aktu irregularidade ne’ebé komete hosi kandidatu PR iha ámbitu kampaña eleisaun Prezidente Repúblika” iha salaun Auditoriu CNE, Dili, sesta ne’e.

Nia akresenta, ida-ne’e mak sai preokupasaun boot tanba penalti funsiona de’it ba partidu kiik, no kampaña eleisaun prezidensiál ne’e hanesan prosesu edukasaun ba sosiedade sira atu hili sira-nia prezidente.

“Prosesu edukasaun ida mós ba ita-nia sosiedade, edukasaun atu fó hatene ba ita-nia sidadaun sira atu hili ita la’ós tanba obrigada no la’ós tanba tauk hetan malisan bainhira ita lakon lae, maibé sira hili tanba sira fiar duni no reprezenta nia aspirasaun, no nia atu manan ka lakon ne’e nia kontente nafatin tanba nia hili tuir nia hakarak. Bainhira kampania, nia sei konsentra de’it ba nia programa sira,” nia hateten.

Tanba ne’e, nia respeita kandidatura Prezidente Repúblika no sei la halo akuzasaun no defama maibé buat ne’ebé nia halo mak konsentra ba saida mak halo bainhira sai Prezidente Repúblika.

Nia dehan antes ne’e nia mós hanesan Prezidente Konsellu Imprensa órgaun instituisaun ne’ebé tau-matan ba konduta étika jornalista sira-nia entaun bainhira tama iha atividade polítika tenke sai ezemplu ida ba ko’alia ne’ebé iha respeita, iha étika, norma morál iha sosiedade ida.

“Timor-Leste ne’ebé fraternidade liu katak ita tenke haree malu hanesan inan-feton no maun-alin entaun labele loke oportunidade hodi hatuun malu no defama malu iha prosesu kampaña eleitorál nian,” nia dehan.

Diretór Ezekutivu Interinu FONGTIL, Helio Dias da Silva, hateten, FONGTIL hola inisiativa halo dialogu ba kandidatura PR atu antisipa labele mosu penalti iha tempu kampaña eleisaun prezidensiál nian, nune’e sira tenke iha kompromisiu no tuir lei ne’ebé iha.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here