Prezidente Tribunal Rekursu, Deolindo dos Santos. Imajen Tatoli/Antonio Goncalves.

DILI, 19 janeiru 2022 (TATOLI)—Prezidente Tribunál Rekursu, Deolindo dos Santos, hateten aprezentasaun lista kandidatura hosi kandidatu Prezidente Repúblika ne’ebé atu kompete iha eleisaun prezidensiál 2022 ba Tribunál Rekursu ne’e durante loron 20, sura hosi Prezidente Repúblika dekreta kalendáriu eleisaun.

Notísia Relevante: Eleisaun ba Prezidente Repúblika sei akontese iha 19 marsu 2022

Prezidente TR ne’e informa, ekipa Tribunál Rekursu sei simu lista kandidatura Prezidente Repúblika hosi kandidatu sira to’o 04 fevereiru, tanba termu prazu ba aprezentasaun kandidatura Prezidente Repúblika ba iha Tribunál Rekursu ne’e hahú hosi 15 janeiru to’o 04 fevereiru 2022.

“Prezidente Repúblika dekreta ona kalendáriu kona-ba data eleisaun prezidensiál nian agora prazu la’o hela ba aprezentasaun kandidatura ninian dentru loron 20. Nune’e kandidatu bele aprezenta sira-nia kandidatura ona ba Tribunál Rekursu tuir lei haruka. Termu prazu ba aprezentasaun kandidatura ba iha Tribunál Rekursu hahú hosi 15 janeiru to’o 04 fevereiru 2022,” Deolindo dos Santos hateten ba jornalista sira iha Parlamentu Nasionál, kuarta ne’e.

Nia hateten, ekipa Tribunál Rekursu preparadu atu halo atendimentu ba kandidatu sira maibé to’o agora seidauk iha kandidatu ida mak lori nia lista kandidatura ba rejistu iha Tribunál Rekursu.

Kriteira ka rekezitu ba kandidatura Prezidente Repúblika atu kumpre hodi bele rejistu iha Tribunál Rekursu mak hanesan kartaun eleitorál ho apoiante rihun lima (5000) no rekezitu seluk tán.

Enkuantu, prazu tuir dekretu estabelese tuir kalendáriu ne’ebé Sekretáriadu Tékniku Administrasaun Eleitorál (STAE) aprova no públika ona iha jornál repúblika.

Kalendáriu eleitorál ba eleisaun Prezidente Repúblika

Kalendáriu eleitorál ba eleisaun Prezidente Repúblika, imprime iha 19 marsu to’o 02 maiu markasaun eleisaun no kalendáriu.

Dekretu Prezidente Repúblika markasaun loron eleisaun ba Prezidente Repúblika (14/01/2022) no publikasaun dekretu Prezidente Repúblika iha jornál repúblika iha 15/01/2022.

STAE públika kalendáriu operasaun eleitorál, 15-23 janeiru 2022.

Kandidatura no respetivu kontensiozu

Termu prazu ba aprezentasaun kandidatura ba iha Tribunál Rekursu hahú hosi loron 15 fulan-janeiru to’o loron 04 fulan-fevereiru tinan 2022.

Hafoin simu lista kandidadura, Supremu Tribunál Rekursu (STJ) verifika regularidade prosesu, autentikasaun ba dokumentu no elijibilidade kandidatu sira-nian.

Prazu ba iregularidade kazu Prezidente STJ notifika reprezentante kandidatu, no bainhira STJ verifika dokumentu kandidatu sira la kompletu mak sei notifika fila-fali prazu loron rua atu kompleta.

Desizaun Tribunál Rekursu kona-ba kandidatura iha 04-14 fevereiru 2022.

Interpozisaun rekusu ba koletivu Tribunál Rekursu kona-ba admisaun ka rejeisaun kandidatura, 15 janeiru 2022.

Desizaun ba rekursu komunika ba Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, siglá portugés) relasaun ba kandidatura sira defenitamentu admitida iha 17 fevereiru 2022.

Sekretariadu Tékniku Administrasaun Eleitorál (STAE) divulga ka publika kandidatura definitivamente admitidu iha komunikasaun sosiál iha loron 18 no 20 fevereiru 2022.

Konstituisaun sentru votasaun no estasaun votu

Sekretariadu Tékniku Administrasaun Eleitorál (STAE) divulga númeru no fatin sentru votasaun no estasaun votu iha 17 fevereiru 2022.

Kampaña Eleitorál

Periódu kampaña eleitorál akontese iha loron 02-16 marsu 2022.

Votasaun no apuramentu rezultadu

Loron eleisaun iha 19 marsu 2022 no hafoin prosesu votasaun termina inisíu kontajen votu iha sentru votasaun no envia urna ba apuramentu munisipál.

Apuramentu munisipál ba rezultadu no envi akta eleitorál no elementu (votu nulu, protestadu no reklamasaun ne’ebé existe) ba Komisaun Nasionál Eleisaun (CNE, siglá portugés) iha 19 to’o 21 marsu 2022.

Apuramentu finál rezultadu nasionál Komisaun Nasionál Eleisaun (CNE, siglá portugés) iha 22-24 abríl 2022.

Interpozisaun rekursu ba rezultadu nasionál provizóriu ba Tribunál Rekursu (TR) iha 28 abríl no Tribunál Rekursu (TR) deside rekursu iha 29 abríl 2022. Maibé iha loron 29 abríl CNE remete (haruka) akta rezultadu ba Tribunál Rekursu bainhira laiha rekursu.

Tribunál Rekursu (TR) analiza dokumentasaun envia hosi CNE, valida rezultadu no proklama rezultadu no fó sai númeru eleitór inskritu, votante, votu branku, nulu no votu atribui kada kandidatu iha 30 abríl no 05 maiu 2022.

Ikus liu publikasaun iha jornál repúblika ba akordaun Tribunál Rekursu nian.

Notísia Relevante: Kaleidoskópiu 2021: tinan polítika no preparasaun eleisaun prezidensiál 2022

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here