Idózu no ema ho difisiente forma hodi simu subsídiu iha sukursál BNCTL, iha Dili. Imajen TATOLI/António Gonçalves.

DILI, 03 fevereiru 2022 (TATOLI)—Prezidente Institutu Nasionál Seguransa Sosiál (INSS), Longuinhos Armando Leite, relata prosesu pagamentu subsídiu ba idozu no invalidéz ba faze daruak iha tinan 2021 nian besika remata.

Ekipa husi INSS ho Banku Nasionál Komérsiu Timor-Leste (BNCTL,sigla portugés), daudaun ne’e halo hela prosesu pagamentu iha Munisípiu Baucau ne’ebé besik remata.

Notísia Relevante :PN aprova subsídiu ba idozu hasa’e ba $50

“Munisípiu Baucau mak seidauk finaliza tanba suku iha ne’ebá barak liu entaun to’o agora ita-nia ekipa kontinua halo pagamentu maibé hela oituan de’it ona parese iha fulan-fevereiru nia-laran bele konklui ona,” Longuinhos Armando Leite hateten ba Agência TATOLI, Caicoli, kinta ne’e.

Idozu no invalidéz hamutuk ema na’in 93.378 maka simu subsídiu Governu nian ne’e iha faze daruak durante 2021 ho totál orsamentu $17.172.040.

Husi benefisiáriu 93.378 rejistu husi Aileu ema hamutuk na’in 3.307, Ainaro 5.138,  Baucau 14.446, Bobonaro 9.224, Covalima 6.129,  Dili 9.366,  Ermera 8.013, Lautém 5.788, Liquiça 6.456, Manatuto 4.448, Manufahi 5.745, RAEOA 6.452 no Munisípiu Viqueque 8.886.

Enkuantu, iha tinan 2022, INSS sei hahú implementa pagamentu subsídiu ho valór $50 ba idozu no invalidéz kada fulan. Tanba iha loron 09 fulan-dezembru 2021 liubá, Deputadu sira iha Uma Fukun Parlamentu Nasionál aprova proposta númeru 147 hodi aumenta ba $50 kada fulan kompara ho antes ne’e $30.

Deputadu sira aprova proposta númeru 147 hodi hasa’e subsídiu ba idózu kada fulan $50, ho votasaun a-favór 32, kontra 26 no abstensaun hitu (7), nune’e proposta ne’e pasa Aditamentu hosi artigu 20 a, subsídiu apoiu idozu no invalidéz kria hosi dekretu lei 19/2008, 19 juñu, iha tinan 2022 montante $50 kada fulan.

Notísia Relevante :INSS prontu implementa subsídiu idozu $50 ne’ebé PR promulga ona

Jornalista : Osória Marques

Editór : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here