Idózu no ema ho difisiente simu subsídiu iha sukursál BNCTL, iha Dili. Imajen TATOLI/António Gonçalves.

DILI, 09 dezembru 2021 (TATOLI)—Reprezentante povu iha uma fukun Parlamentu Nasionál, kinta ne’e, aprova subsídiu ba idozu no invalidéz ne’ebé antes ne’e $30 hasa’e ba $50 kada fulan.

“Ami hanoin katak tempu to’o ona hosi osan ne’ebé ita-nia maluk idózu no invalidéz sira simu $30 kada fulan, se bele aumenta tan $20 halo $50 kada fulan,” Deputadu proponente, António de Sa Benevides, hateten iha plenária PN.

Hanoin deputadu barak ba hala’o fiskalizasaun halo mós vizita kontaktu eleitorál dalaruma iha mós oportunidade vizita defisiente, ferik no katuas sira-ne’ebé iha área rurál balun kondisaun moris triste tebes.

Tanba ne’e, nia dehan, ho proposta ne’e aumenta subsídiu refere hodi fó kondisaun di’ak ba defisiente no idozu sira.

Iha diskusaun debate proposta Orsamentu Jeral Estadu (OJE) 2022 faze espesialidade ne’e, deputadu sira aprova proposta númeru 147 hodi hasa’e subsídiu ba idózu kada fulan $50, ho rezultadu votasaun a-favór 32, kontra 26 no abstensaun hitu (7), nune’e proposta ne’e pasa

Aditamentu hosi artigu 20 a, subsídiu apoiu idozu no invalidéz kria hosi dekretu lei 19/2008, 19 juñu, iha tinan 2022 montante $50 kada fulan.

Despeza orgaun servisu administrasaun sentrál títulu dotasaun todo Governu kategória despeza bens servisu, programa ho kódiku 980 kona-ba igualidade jéneru no inkluzaun sosiál, dotasaun inisiál millaun $73 alterasaun aumenta tan millaun $23,520.000 no dotasaun finál sa’e ba millaun $96,520.000.

Sei tau ba títulu tabela 4 ba reseita seguransa sosiál iha kategória despeza transferénsia orsamentu administrasaun sentrál rejime naun kontributivu.

Proposta ne’e mai hosi António de Sa Benevides ho Mariano Assanami Sabino.

Mezmu ho aprovasaun ne’e, Ministru Finansa (MF), Rui Augusto Gomes, hateten iha implikasaun barak hanoin Institutu Nasionál Seguransa Sosiál (INSS) halo hela preparativu karik se bele ba tinan 2023 implementa, tanba ne’e Parlamentu bele aprova maibé sei iha difikuldade atu ezekuta.

“La’ós la tau matan ba idozu sira maibé problema mak iha ezekusaun,” nia dehan.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here