Idózu no ema ho difisiente simu subsídiu iha sukursál BNCTL, iha Dili. Imajen TATOLI/António Gonçalves.

DILI, 12 janeiru 2022 (TATOLI)—Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite, hateten INSS prontu atu implementa subsídiu idozu $50 ne’ebé Parlamentu Nasionál aprova no Prezidente Repúblika promulga ona maibé tenke iha diploma hosi Ministériu Solidaridade Sosiál no Inkluzaun (MSSI).

Notísia Relevante: Prezidente Repúblika promulga lei OJE 2022

Prezidente INSS, Longuinhos Armando Leite. Imajen TATOLI/Egas Cristóvão

“Ita hanoin katak orsamentu idozu nian, ita-nia deputadu sira iha Parlamentu Nasionál aprova ona katak atu hasa’e ba $50, ne’e ami parte tékniku prontu implementa maibé nia tenke iha diploma ruma. Mezmu ita iha ona orsamentu maibé ita mós presiza altera lai lei tanba uluk lei ne’e hateten $30 kada fulan ida no agora sa’e ba $50, entaun ita tenke altera tiha lai lei ne’e,” Prezidente INSS ne’e hateten ba Agência TATOLI, liuhosi telefónika, kuarta ne’e.

Prezidente ne’e hatutan, tékniku INSS prontu ezekuta maibé presiza mós haree ba saláriu mínimu ho pensaun mínimu funsionáriu sira-nian tanba saláriu mínimu ne’e $115 de’it no tauk karik sira-nia pensaun kiik liu fali idozu sira-nian.

“Tanba ita tauk mak ita-nia traballadór liuliu funsionáriu sira maibé aban bainrua nia pensaun kiik liu fali $50. Purezemplu sira-ne’ebé nível-1 sira-ne’e, nia kontribuisaun nune’e mak aban bainrua nia grau la sa’e mak bainhira nia reforma (pensium) entaun nia pensaun kiik liu fali apoiu ba idozu nian. Tanba, ita haree diferensa ne’e 5% de’it. Tanba ne’e mak ita bainhira altera ona maibé ita mós presiza tenke haree ba pensaun mínimu ne’e,” nia esplika.

Notísia Relevante: PR promulga alterasaun dekretu-lei subsídiu apoiu ba idozu no invalidéz

Bainhira iha ona diploma no altera ona lei ne’e, INSS bele ona implementa iha tinan ne’e, depois mak Governu haree fali pensaun mínimu sira tanba apoiu idozu boot liu fali pensaun mínimu funsionáriu ho nível-1 sira.

Ida-ne’e Governu tenke haree no define ona data katak ida-ne’ebé mak tama ba prestasaun sosiál no ida-ne’ebé mak la tama prestasaun sosiál.

“Ezemplu, ita hasa’e ona osan idozu nian entaun oinsá ho parte veteranu sira-nian, presiza haree buat sira-ne’e hotu. Ami hanesan tékniku prontu implementa maibé tenke asegura ho lei maske PN aprova no PR promulga tiha ona,” nia informa.

Bainhira implementa tiha apoiu idozu nian ho $50 ne’e, nia hateten, ema sei prefere liu ba $50 fulan-fulan duke servisu ho saláriu mínimu $115 depois pensaun mínimu ho de’it $45 ne’e la’ós INSS nia kompeténsia maibé INSS ne’e implementadór.

Aditamentu hosi artigu 20 a, subsídiu apoiu idozu no invalidéz kria hosi dekretu lei 19/2008, 19 juñu, iha tinan 2022 montante $50 kada fulan.

Despeza orgaun servisu administrasaun sentrál títulu dotasaun todo Governu kategória despeza bens servisu, programa ho kódiku 980 kona-ba igualidade jéneru no inkluzaun sosiál, dotasaun inisiál millaun $73 alterasaun aumenta tan millaun $23,520,000 no dotasaun finál sa’e ba millaun $96,520,000.

Iha fulan-juñu 2021 ne’e idozu no invalidéz territóriu nasionál ne’ebé mak simu apoiu hamutuk 97.717.

Notísia Relevante: PN aprova subsídiu ba idozu hasa’e ba $50

Jornalista : Osória Marques

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here