Kandidatu Independente Prezidente Repúbllika 2022-2027, Hermes da Rosa Correia Barros “ Sekiliras Aihaii”. imajen/Natalino Costa.

DILI, 02 fevreiru 2022 (TATOLI)—Prezidente Komisaun Funsaun Públika (KFP), Faustino Cardoso, informa KFP simu ona pedidu lisensa espesiál ho vensimentu hosi Funsionáriu Públiku ida hosi Ministériu Administrasaun Estatal (MAE) ho naran Hermes da Rosa Correia Barros, tanba kandidata an ba Rrezidente Repúblika periodu 2022-2027.

Notísia Relevante: To’o ohin, Tribunál Rekursu rejista ona kandidatu PR na’in-11

“Ha’u foin haree funsionáriu hosi Ministériu Administrasaun Estatál (MAE), na’in-ida (1) ho naran Hermes da Rosa Correia Barros, haruka ona pedidu ba Komisaun Funsaun Públika husu lisensa espesiál ho vensimentu hodi kandidata nia an ba Prezidente Repúblika,” Prezidente Komisaun Funsaun Públika, Faustino Cardoso, hateten ba Agência Tatoli, iha Kuartél Jerál F-FDTL Fatuhada, hafoin partisipa serimónia transformasaun FALINTIL ba F-FDTL ba dala-21, kuarta  ne’e.

Lisensa espesiál refere, oras ne’e daudaun KPF prosesa ona nune’e hodi fó lisensa espesiál ba funsionáriu ne’e ho vensimentu tanba nu’udar kandidata ba PR, no bainhira eleitu mós kontinua hato’o pedidu foun hodi asume kargu durante nia mandatu.

Ba funsionáriu ne’ebé atu sai ekipa susesu ba kandidatura PR ne’ebé husu lisensa lahó vensimentu durante períodu kampaña, maibé to’o ohin loron KFP seidauk simu pedidu hosi funsionáriu sira-ne’e bele mós hosi institiusaun liuhosi sira-nia superiór sira.

Notísia Relevante:  Kandidatu Hermes Barros no Isabel Ferreira rejista iha Tribunál Rekursu

“Ami tenta atu haklaken liután hodi alerta ba sira kona-ba importánsia atu hatene prosedimentu legál sira, nune’e sira belé informadu kona-ba regra no prosedimentu bainhira sira hakarak partisipa hodi fó apoiu ba kandidatura sira durante períodu kampaña eleitorál nu’udar ekipa susesu,” nia hateten.

Bazea ba regra no prosedimentu bainhira funsionáriu ne’ebé mak hakarak husu lisensa lahó vensimentu hakarak sai ekipa susesu ba kandidatura sé de’it bele hato’o pedidu no prenxe formuláriu iha KFP, hafoin KFP bele emite hodi hasai.

Tuir kalendáriu ne’ebé mak Prezidente Repúblika Francisco Guterres Lú-Olo dekreta, eleisaun prezidensiál sei realiza iha loron 19 fulan-Marsu ne’e no daudaun ne’e kandidatura Prezidente Repúblika na’in-11 mak rejista ona iha Tribunál Rekursu.

Kalendáriu eleitorál ba eleisaun Prezidente Repúblika

Kalendáriu eleitorál ba eleisaun Prezidente Repúblika, imprime iha 19 marsu to’o 02 maiu markasaun eleisaun no kalendáriu.

Dekretu Prezidente Repúblika markasaun loron eleisaun ba Prezidente Repúblika (14/01/2022) no publikasaun dekretu Prezidente Repúblika iha jornál repúblika iha 15/01/2022.

STAE públika kalendáriu operasaun eleitorál, 15-23 janeiru 2022.

Kandidatura no respetivu kontensiozu

Termu prazu ba aprezentasaun kandidatura ba iha Tribunál Rekursu hahú hosi loron 15 fulan-janeiru to’o loron 04 fulan-fevereiru tinan 2022.

Hafoin simu lista kandidadura, Supremu Tribunál Rekursu (STJ) verifika regularidade prosesu, autentikasaun ba dokumentu no elijibilidade kandidatu sira-nian.

Prazu ba iregularidade kazu Prezidente STJ notifika reprezentante kandidatu, no bainhira STJ verifika dokumentu kandidatu sira la kompletu mak sei notifika fila-fali prazu loron rua atu kompleta.

Desizaun Tribunál Rekursu kona-ba kandidatura iha 04-14 fevereiru 2022.

Interpozisaun rekusu ba koletivu Tribunál Rekursu kona-ba admisaun ka rejeisaun kandidatura, 15 janeiru 2022.

Desizaun ba rekursu komunika ba Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, siglá portugés) relasaun ba kandidatura sira defenitamentu admitida iha 17 fevereiru 2022.

Sekretariadu Tékniku Administrasaun Eleitorál (STAE) divulga ka publika kandidatura definitivamente admitidu iha komunikasaun sosiál iha loron 18 no 20 fevereiru 2022.

Konstituisaun sentru votasaun no estasaun votu

Sekretariadu Tékniku Administrasaun Eleitorál (STAE) divulga númeru no fatin sentru votasaun no estasaun votu iha 17 fevereiru 2022.

Kampaña Eleitorál

Periódu kampaña eleitorál akontese iha loron 02-16 marsu 2022.

Votasaun no apuramentu rezultadu

Loron eleisaun iha 19 marsu 2022 no hafoin prosesu votasaun termina inisíu kontajen votu iha sentru votasaun no envia urna ba apuramentu munisipál.

Apuramentu munisipál ba rezultadu no envi akta eleitorál no elementu (votu nulu, protestadu no reklamasaun ne’ebé existe) ba Komisaun Nasionál Eleisaun (CNE, siglá portugés) iha 19 to’o 21 marsu 2022.

Apuramentu finál rezultadu nasionál Komisaun Nasionál Eleisaun (CNE, siglá portugés) iha 22-24 abríl 2022.

Interpozisaun rekursu ba rezultadu nasionál provizóriu ba Tribunál Rekursu (TR) iha 28 abríl no Tribunál Rekursu (TR) deside rekursu iha 29 abríl 2022. Maibé iha loron 29 abríl CNE remete (haruka) akta rezultadu ba Tribunál Rekursu bainhira laiha rekursu.

Tribunál Rekursu (TR) analiza dokumentasaun envia hosi CNE, valida rezultadu no proklama rezultadu no fó sai númeru eleitór inskritu, votante, votu branku, nulu no votu atribui kada kandidatu iha 30 abríl no 05 maiu 2022.

Ikus liu publikasaun iha jornál repúblika ba akordaun Tribunál Rekursu nian.

Notísia Relevante: Eleisaun ba Prezidente Repúblika sei akontese iha 19 marsu 2022

Jornalista : Celestina Teles

Editór      :  Cancio  Ximenes  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here