Pesoál saúde hala’o hela atendimentu ba labarik sira-ne’ebé hetan moras dengue. Imajen Tatoli/Antonio Dasiparu.

DILI, 30 janeiru 2022 (TATOLI)—Dirasaun Nasionál Saúde Públika liuhosi Departamentu Vijilánsia Epidemologia iha Ministériu Saúde (MS), daudaun ne’e rejista kazu dengue iha Timor-Leste hamutuk 1.198 no hosi númeru ne’e iha labarik na’in-20 mak mate.

Notísia Relevante: Pasiente dengue sa’e ba 1.035 no óbitu na’in-18

“Ohin, loron 30 janeiru 2022 kazu dengue hamutuk 1.198 no kumulativu óbitu na’in-20,” refere nota imrensa ne’ebé Agência Tatoli asesu, domingu ne’e.

Maioria kazu ne’e deteta hosi munisípiu Dili ho totál 809, Ermera iha kazu 77, Manatuto 77, Baucau 52, Manufahi 52, Covalima 43, Bobonaro 25, Liquica 21, Aileu 16, Ainaro 14, Viqueque 10 no RAEOA rua (2).

Hosi númeru óbitu na’in-20 ne’e maiória labarik, ne’ebé kazu óbitu iha Díli na’in-11, Ermera haat (4), Viqueque ida (1), Covalima rua (2), Bobonaro ida (1) no Ainaro ida (1), nune’e Case Fatality Rate nivel nasionál ne’e 1,7%.

To’o ohin loron no iha semana DAHAAT IHA fulan-janeiru tinan 2022 ne’e, postu administrativu Don Aleixo mak hetan kazu aas liu mak hamutuk 412, Cristo Rei 162, Nain Feto 111.

Alende ne’e, Fasilidade Saúde iha Díli, hanesan Hospitál Nasionál Guido Valadares (HNGV), rejista ona kazu dengue hamutuk 193, Klinika Fatumeta 113, Sentru Saúde Comoro 205, Sentru Saúde Vera Crúz 48, Sentru Saúde Formoza 135, Sentru Saúde Becora 85, Sentru Saúde Atauro 11, Sentru Saúde Metinaro ualu (8), Klínika Bairru Pité ualu (8) no Klínika Motael na’in-rua (2).

Tanba ne’e, Ministériu Saúde apela ba populasaun iha Dili nomós iha munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas ka senri laran-sa’e, liman-ain sikun moras hodi bele hetan atendimentu hosi profisionál saúde sira.

Apela mós ba populasaun iha Díli no iha munisípiu sira atu husu ba Autoridade Munisipál no autoridadel lokál atu bele orienta komunidade halo limpeza jerál iha suku no bairru sira hodi fase tanke, bidon ka balde no tau bee semana ida dala ida.

Populasaun sira tenke hamoos sasán hanesan roda aat, vazu ai-funan sira-ne’ebé bee nalihun atu susuk labele tolun iha laran, haloot roupa ho di’ak iha uma laran, uza roupa ne’ebé liman-naruk karik toba iha tempu loron, uza ai-moruk hanesan repelente ka autan, uza moskitéiru karik toba iha tempu loron no so’e lixu iha nia fatin.

Notísia Relevante: Ministra Odete: “Governu esforsu hela atu ‘kombate’ moras dengue”

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here