Pesoál saúde sira halo hela atendimentu ba labarik sira ne’ebé hetan moras dengue iha Sentreu Saúde Vera Cruz, kuarta (19/01/2022). Imajen Tatoli/Antonio ‘Dasiparu’

DILI, 25 janeiru 2022 (TATOLI)— Diresaun Nasionál Saúde Publika liuhosi Departamentu Vizilánsia Epidemolojia, iha Ministériu Saúde, kinta ne’e, rejista kazu dengue hamutuk  1.035, hosi númeru ne’e labarik na’in-18 mak mate ona.

“Situasaun kazu Dengue iha Timor-Leste, loron 27 janeiru 2022, kazu dengue hamutuk 1.035 no kumulativu óbitu na’in-18,” refere nota ne’ebé Agência TATOLI asesu kinta ne’e.

Notísia relevante: Laiha estoke aimoruk rega susuk, dengue hamate labarik na’in-18

Maioria kazu ne’e deteta hosi munisípiu Dili ho totál  698, Baucau iha kazu  50, Manatuto  67, Covalima 31, Ermera 71, Manufahi 49, Viqueque neen, Ainaro 12, Liquiça 16, Aileu 11 no Bobonaro 24.

Hosi númeru óbitu na’in-18 ne’e maioria labarik, hanesan kazu óbitu iha Dili na’in-10, Ermera iha óbitu na’in-haat, na’in-ida hosi Ainaro, na’in-ida hosi Bobonaro no na’in-rua hosi Covalima, nune’e totál Case Fatality Rate nivél nasional ho 1,7%.

To’o ohin loron semana dahaat  fulan-janeiru ne’e, posto administrativu Dom Alexo iha kazu 345, Cristo-Rei 140, Vera-Cruz 96, Na’in-Feto 100.

Alende ne’e, Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue 177, Klínika Fatumeta 88, Sentru Saúde Comoro 165, Sentru Saúde Vera-Cruz 47, Sentru Saúde Formoza 125, Sentru Saúde Becora 75, Sentru Saúde Atauro 11, Sentru Saúde Metinaro neen  , Klínika Bairru-Pité  haat no Klínika Motael na’in-ida.

Nune’e, Ministériu Saúde apela ba populasaun iha Dili laran no mós iha munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, senti laran sa’e, liman ain no sikun moras hodi bele hetan atendimentu husi profisionál saúde sira.

Apela mós ba autoridade munisipál no autoridade lokál atubele orienta komunidade halo limpeza jerál iha suku no bairru sira hodi fase tanke, bidon ka balde tau bee semana ida dala ida.

Hamoos sasán ka limpeza hanesan roda aat, bazu aifunan atu susuk labele tau tolun, haloot ropa ho di’ak iha ita nia uma laran, uza ropa ne’ebé liman naruk karik toba iha tempu loron, uza aimoruk hanesan repelente ka autan, uza mosketéiru karik toba iha tempu loron, soe lixu iha nia fatin.

Notísia relevante: Governu promove kampaña limpeza jerál iha territóriu kombate dengue

Jornalista:  Natalino Costa

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here