Ministra Saúde, Odete Maria Freitas Belo. Imajen Tatoli/Francisco Sony.

BOBONARO, 28 janeiru 2022 (TATOLI) – Ministra Saúde Odete Maria Freitas Belo, fó-sai kata oras ne’e Governu esforsu hela atu kombate dengue no surtu COVID-19 maibé husu ba entidade hotu iha munisípiu Bobonaro serbisu hamutuk halo prevensaun moras ne’e.

Ministra Odete akresenta, atu halo prevensaun ba moras rua ne’e presiza autoridade munisípiu sira tau forsa hamutuk hodi apoia pesoál saúde sira ne’ebé destaka iha ospitál no sentru saúde sira halo prevensaun no kombate moras dengue iha munisípiu Bobonaro.

“Governu esforsu hela atu kombate moras ne’e, maibe atu halo prevensaun ba dengue presiza kontribuisaun másimu hosi komunidade sira liuhosi maneira sira hanesan hamoos uma-laran no li’ur, hakoi lata-mamuk, hamoos vazu ai-funan, hamos tanki bee-moos, nune’e labele fó oportunidade ba susuk Aides-Ageptis nia tolun iha fatin hirak-ne’e,” nia apela asuntu ne’e iha serimónia inagurasaun armazein SAMES, I.P, Rejionál Maliana, suku Lahomea, postu administrativu Maliana, munisípiu Bobonaro, sesta ne’e.

Maibé Governante ne’e la esplika detallu kona-ba sá esforsu ma koras ne’e Ministériu Saúde hala’o hodi bele justifika ba realidade.

Tanba ne’e nia husu prezidente autoridade Bobonaro hamutuk ho xefe suku sira tenke serbisu hamutuk ho diretór munisipál saúde nian, infermeiru no médiku sira oinsá atu halo prevensaun ba dengue nomoos Covid-19.

“Ami sei tau matan ba moras hotu-hotu, la’ós ba dengue ho Covid-19 de’it, tanba moras rua ne’e mai dala-ida, surtu Dengue ataka hela ita, tenke fó atensaun halo limpeza,” nia fó hanoin.

Nia dehan, serbisu hirak-ne’e simples maibé la hala’o entaun fó impaktu ba sosiedade atu moris ho ambiente saudável.

Ministra Saúde Odete Maria Freita Bello, enkoraja komunidade sira iha munísipiu Bobonaro, atu nafatin kumpre regra protokolu nune’e bele halo prevensaun propagasaun surtu covid-19.

“Ha’u hakarak nafatin apela, kuidadu ho Covid-19, uza ita-boot sira-nia maskára, fase liman beibeik ho sabaun. Bainhira senti isin-manas ka inus-been ba lalais ospital atubele hetan tratamentu saúde,” nia fó hanoin.

Notísia relevante: Laiha estoke aimoruk rega susuk, dengue hamate labarik na’in-18

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here