Moras Lepra. imajen Google

DILI, 27 janeiru 2022 (TATOLI)— Xefe Unidade ba Programa Moras Tropikál Negligenciada (MTN), iha Ministériu Saúde, José Liu Fernandes, hateten Ministériu Saúde (MS) deside ona hodi komemora loron mundiál lepra iha munisípiu Bobonaro, aban (28/01), tanba kazu moras lepra númeru aas iha munisípiu refere.

“Tinan ida ne’e, ita sei selebra loron mundiál lepra iha Bobonaro. Selebrasaun ne’e ho objetivu atu divulga informasaun kona-ba asaun prevensaun importante sira ne’ebé mak komunidade presiza hatene hodi kombate lepra iha Timor-Leste,” José Liu Fernandes hateten ba Agência TATOLI iha nia knaar fatin-Lahane, Dili, tersa ne’e.

Notisia relevante: Hena-Mutin Iha Isin-Lolon La Sente Katar No Moras, Sintoma Lepra

Tuir nia komunidade presiza kompriende saida mak moras lepra, no ninia impaktu sira atu nune’e komunidade sira bele hakbesik-an ba sentru saúde sira hodi halo tratamentu karik iha sintoma ka sinál ruma kona-ba moras lepra.

“Parte relevante hotu, inklui parseiru sira no NGO hirak ne’ebé mak toma konta kona-ba kombate moras lepra iha Timor-Leste, sei partisipa iha komemorasaun ba loron importante ne’e. Ami mós konvida maluk sira ne’ebé mak moris ho lepra ka hetan moras lepra ne’ebé mak agora daudaun halo hela tratamentu atu partisipa mós iha eventu refere. Tanba atividade ne’e importante tebes ba komunidade atu hatene  impaktu husi moras lepra ne’e rasik,” nia akresenta.

Tanba, impaktu hosi moras lepra risku ba ema nia vida, bainhira la halo tratamentu sedu mak bele kauza difisiénsia matan, fíziku no seluk tan.

Tanba ne’e, MS ho ajénsia relevante sira halo contact tracing no random screening atu deteta maluk sira ne’ebé mak hetan moras lepra.

Tuir ajenda iha selebrasaun refere, sei halao screening no contact tracing hodi indentifika maluk sira ne’ebé mak sofre moras lepra.

“Antes selebrasaun refere, ami deteta ona ema liu na’in-20 mak hetan moras lepra iha munisípiu Bobonaro. Tanba ne’e mak contact tracing ne’e importante atu buka hatene kondisaun pasiente lepra sira ne’ebé mak sei halo hela tratamentu. Ezemplu ida mak hanesan, tinan kotuk ami deteta familia ida iha ema na’in-tolu mk hetan moras lepra, maibé depois ami halo contact tracing, iha tan membru familia na’in-rua mak hetan moras ida ne’e,” nia esplika.

Iha komemorasaun refere, kampaña konsientizasaun lepra sei fó sai iha TV no Radio hodi hasa’e koñesimentu komunidade sira nian hodi kombate lepra iha Timor-Leste.

Tuir dadus desde tinan 2000 too agora Ministériu Saúde rejista ona kazu lepra liu ona ema na’in-5.000 iha Timor-Leste.

Notisia relevante: Tratamentu Lepra, Depende Kondisaun

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here