Xefe Estadu Maiór Jenerál F-FDTL, Tenente Jenerál Lere Anan Timur, Imajen TATOLI/Antonio Dasiparu.

DILI, 26 janeiru 2022 (TATOLI)— Prezidente Repúblika (PR), Francisco Guterres ‘Lú Olo, aban (27/01) sei reune ho Konsellu Superior Defeza no Seguransa (KSDS) iha Palásiu Prezidénsial, Dili, hodi rona hanoin sira relasiona ho pedidu Governu ba ezonerasaun no nomeasaun ba kargu Xefia FALINTIL-Forsa Defeza Timor-Leste (F-FDTL).

“Aban, Reuniaun Konsellu Superior Defeza no Seguransa (KSDS), mak haree kona-ba ha’u nia reforma liuliu ba ezonerasaun no nomesaun ba kargu Xefia sira, hafoin Prezidente Repúblika deside tuir nia kompeténsia,” Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, hafoin ramata enkontru ho PR Lú-olo, iha Palasiu Prezidensia Bairru-Pité, kuarta ne’e.

Notísia relevante:  Governu aprova proposta ezonerasaun no nomeasaun kargu Xefia F-FDTL

Lere rekoñese prosesu ba nia-pedidu reforma ne’e liuhosi mekanizmu naruk tanba Prezidente Repúblika hanesan Komandante Supremu Forsa Armada presiza rona opiniaun hotu hafoin deside ka dekreta.

Nune’e, Veteranu tinan 24 ne’e ho esperansa imposivél Prezidente Repúblika la aseita nia-pedidiu reforma ne’ebé Governu mós aseita no aprova ona.

“Ha’u hanoin katak Prezidente Repúblika Lú-Olo la’ós ema seluk, maibé ha’u nian irmão, ha’u nian kompañeiru no Primeiru Ministru Taur Matan Ruak mós la’ós ema seluk,” Tanente Jenerál ne’e akresenta.

Tanba ne’e, Lere fó hanoin ba sidadaun hotu katak veteranu sira hosi ai-laran durante luta tinan 24 hasoru okupasaun indónezia, nunka iha hanoin atu husik malu tanba kesi ho ran no isin.  

“Ami ne’e la husik malu, saida mak kesi ami hamutuk ne’e la’ós osan, la’ós riku-soin, maibé raan ho isin mak kesi ami hamutuk. Ema iha liur bele dehan katak ami sira ne’e fahe malu, maibé ami uluk jura no kompromete ona katak ho ran ho isin katak ita mate hamutuk no ita moris hamutuk,” Veteranu ne’e re-lembra.

Entretantu, Governu liuhosi desizaun koletiva Konsellu Ministru (KM), delibera propoin ba Prezidente Republika, atu ezonera Tenente Jenerál Lere Anan Timur, hosi kargu Xefe Estadu Maiór Jenerál Forsa Armada.

Aleinde ne’e, proposta ne’e inklui ezonera Majór Jenerál Falur Rate Laek, hosi Kargu Vise-Xefe Estadu Maiór Jenerál Forsa Armada no nomesaun Majór Jenerál Falur Rate Laek, ba Kargu Xefe Estadu Maiór Jenerál Forsa Armada, nomesaun Brigadeiru Jenerál Calisto dos Santos Coli ‘Coliati’, ba Kargu Vise-Xefe Estadu Maiór Jenerál Forsa Armada.

Nune’e mós, mantein nomeasaun Komodoru Pedro Klamar Fuik, ba Kargu Xefe Estadu Maiór Forsa Armada.

Biban ne’e, ezekutivu sira konkorda ho promosaun Jenerál hirak ne’ebé mak sei asume kargu hanesan Xefe Estadu Maiór Jenerál F-FDTL no hirak ne’ebé sei asume kargu hanesan Vise-Estadu Maiór.

Kona-ba promosaun ne’e klaru katak tuir lei, atu sa’e ba Xefe Estadu Maiór Jenerál tenke Jenerál fitun tolu, entaun Jenerál Falur Rate Laek daudaun hanesan Vise-Xefe Estadu ho fitun rua, entaun biban ne’e promove ba fitun tolu atubele asume hanesan Xefe Estadu Maiór Jenerál F-FDTL.

Hanesan mós ba Brigadeiru Jenerál ne’ebé fitun ida, oras ne’e daudaun mak Brigadeiru Jenerál Calisto dos Santos Coli ‘Coliati’, nune’e atubele asume knaar hanesan Vise-Xefe Estadu Maiór Jenerál tuir lei tenki sa’e ba fitun rua tanba ne’e maka aprova promosaun ba fitun rua.

Tenente Jenerál Lere Anan Timur lidera F-FDTL durante tinan-haat, hahú 2015 to’o 2019, hafoin prolonga ka estende tan.

Notísia relevante: Kandidata an ba PR, Lere submete ona karta reforma ba Governu

Lere foti lisensa hodi hein PR dekreta pedidu reforma

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here