Primeiru-Ministru, Taur Matan Ruak, prezide reuniaun Konsellu Ministru. Iha Palásiu Governu, kuarta (22/12). Imajen TATOLI/Francisco Sony

DILI, 21 janeiru 2022 (TATOLI)Governu liuhosi desizaun koletiva Konsellu Ministru (KM), sesta ne’e, aprova proposta ezonerasaun no nomeasaun ba kargu xefia FALINTIL-Forsa Defeza Timor-Leste (F-FDTL).

Desizaun ne’e ligadu ho pedidu reforma hosi Xefe Estadu Maiór Jenerál F-FDTL, Tenente Jenerál Lare Anan Timur.

“Konsellu Ministru hala’o sorumutuk estraordináriu hodi delibera propoin ba Prezidente Republika, atu ezonera Tenente Jenerál Lere Anan Timur, hosi kargu Xefe Estadu Maiór Jenerál Forsa Armada,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu.

Notísia relevante: Kandidata an ba PR, Lere submete ona karta reforma ba Governu

Aleinde ne’e, proposta ne’e inklui ezonera Majór Jenerál Falur Rate Laek, hosi Kargu Vise-Xefe Estadu Maiór Jenerál Forsa Armada no nomesaun Majór Jenerál Falur Rate Laek, ba Kargu Xefe Estadu Maiór Jenerál Forsa Armada, nomesaun Brigadeiru Jenerál Calisto dos Santos Coli ‘Coliati’, ba Kargu Vise-Xefe Estadu Maiór Jenerál Forsa Armada.

Nune’e mós, mantein nomeasaun Komodoru Pedro Klamar Fuik, ba Kargu Xefe Estadu Maiór Forsa Armada.

Hafoin aprovasaun sei haruka ba Prezidente Repúblika nu’udar Komandante Supremu Forsa Armada.

“Tuir dalan Konsellu Militár, halo sira-nia reuniaun, hafoin proposta submete ba Governu liuhosi Ministru Defeza, ho kolaborasaun Primeiru-Ministru halo proposta konjunta ida hodi submete ba Konsellu Ministru hodi halo desizaun hafoin lori ba Prezidente Repúblika, ne’ebé molok foti desizaun ikus sei konvoka reuniaun Konsellu Superiór Defeza no Seguransa,” Ministru esplika.

Biban ne’e, ezekutivu sira konkorda ho promosaun Jenerál hirak ne’ebé mak sei asume kargu hanesan Xefe Estadu Maiór Jenerál F-FDTL no hirak ne’ebé sei asume kargu hanesan Vise-Estadu Maiór.

“Kona-ba promosaun ne’e klaru katak tuir lei, atu sa’e ba Xefe Estadu Maiór Jenerál tenki Jenerál fitun tolu, entaun Jenerál Falur Rate Laek daudaun hanesan Vise-Xefe Estadu ho fitun rua, entaun biban ne’e promove ba fitun tolu atubele asume hanesan Xefe Estadu Maiór Jenerál F-FDTL,” Ministru dehan.

Hanesan mós ba Brigadeiru Jenerál ne’ebé fitun ida, oras ne’e daudaun mak Brigadeiru Jenerál Calisto dos Santos Coli ‘Coliati’, nune’e atubele asume knaar hanesan Vise-Xefe Estadu Maiór Jenerál tuir lei tenki sa’e ba fitun rua tanba ne’e maka aprova promosaun ba fitun rua.

Antes ne’e Lere deklara prontu ona atu kandidata an ba Prezidente Repúblika ba períodu 2022 to’o 2027, ne’ebé ba kestaun ne’e, nia parte admite hetan ona forsa polítika, tanba ne’e nia preparadu kompete.

Tenente Jenerál Lere Anan Timur lidera F-FDTL durante tinan-haat, hahú 2015 to’o 2019, hafoin prolonga ka estende tan.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here