Xefe Estadu Maiór Jenerál F-FDTL, Tenente Jenerál Lere Anan Timur, Imajen TATOLI/Francisco Sony

DILI, 17 janeiru 2022 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál,  Lere Anan Timur, informa nia parte hatama ona karta reforma ba Governu liuhosi Ministru Defeza, atu kandidata an ba Prezidente Repúblika (PR) iha períodu 2022 to’o 2027.

“Ohin dader (17/01), tuku 11:00, ha’u hatama ona karta reforma, maibé kuandu sente laiha rezultadu, mak ha’u sei hatama tan karta rezignasaun aban ou bele bainhira,” Tenente Jenerál Lere Anan Timur, hateten ba jornalista sira hafoin partisipa aniversáriu Polísia Militár ne’ebé halo iha Kintál-boot, segunda ne’e.

Notísia relevante: Tenente Jenerál Lere Anan Timur hakarak reforma hosi F-FDTL

Tuir Lere, nia parte husu reforma ba Estadu no Governu ne’e nuudar últimu karreira tanba ne’e husu Governu labele impede.

“Ha’u hanoin katak ida ne’e ha’u nia direitu, ema ida labele impede ha’u nia direitu tanba rezignasaun ne’e ha’u sakrifika ha’u nia karreira. Tanba ne’e reforma labele, ha’u tenke rezigna-an,” nia sujere.

Maibé, Tenente Jenerál mós rekoñese atu aseita karta reforma ne’e depende ba burokrasia ka sistema administrasaun Governu nian.

“Ha’u hanoin ita nian forsa ne’e la’ós rihun 50 ka rihun 60 atu ita bele eleze, maibé rezignasaun ne’e últimu via ne’ebe ha’u opta,” Lere esplika.

Prontu kandidata an ba PR

Veteranu tinan 24 ne’e afirma, nia parte prontu ona atu kandidata an ba Prezidente Repúblika ba períodu 2022 to’o 2027.

“Ha’u deklara ona katak ha’u prontu kandidata an, ne’e kauza ida ne’ebé ema la halo impedementu ba ha’u nia objetivu,” Tenente Jenerál Lere afirma.

Lere hateten, nia hetan ona forsa polítiku, tanba ne’e nia pronto avansa hodi kompete iha eleisaun Prezidente Repúblika periodu 2022- 2027.

“Ha’u hetan ona forsa polítika tanba forsa polítika mai hosi ita nian povu, laós partidu de’it, maibé povu signifika iha partidu hotu. Ha’u hateten ha’u kandidata ha’u nia an hodi veteran rezisténsia tomak nia naran mak ha’u deside kandidata an”, nia akresenta.

Kandidata-an ba Prezidente Repúblika ho kompromisiu tolu, hanesan sai Prezidente Repúblika hodi halo knaar tuir konstitusaun haruka, simbolu unidade nasionál no komandante suprému Forsa Armada.

Falur mak troka lidera F-FDTL

Entretantu, Tenente Jenerál Lere afirma, bainhira nia parte reforma, Vise Xefe Estadu Maiór Jenerál F-FDTL, Majór Jenerál, Domigos Raul “Falur Rate Laek” mak sei subtitui nia hodi lidera forsa armada Timor-Leste.

“Imi hatene se ha’u sai, se maka mai iha ha’u nia fatin ne’e lideransa ida ne’ebé ita la duvida mak, imi nia aman imi nia pai, Majór Jenerál Falur Rate Laek, Aluc, Sabika no Maunana tanba ema seluk laiha atu mai troka ha’u. So sira ne’e mak hakarak ka lakohi tenke mai hamriik iha ha’u nia fatin,” Lere afirma.

Serimónia Parada Militár iha ambitu komemorasaun anivesáriu Komandu Polísia Militár ba dala XVII. Iha resintu PM, segunda (17/01). Imajen Tatoli/Francisco Sony

Tanba ne’e, Lere husu membru forsa hotu atu hadomi nafatin sira iha serbisu fatin hanesan komandante no hanesan imi-nia aman.

Maski nune’e, nia sente triste tanba durante nia mandatu la konsege rezolve bem-estar ba  membru F-FDTL atu moris ho di’ak. Nune’e husu komandante foun mai halo melloramentu ba bem estar forsa defeza nian.

“Forsa Defeza ne’e nuudar elementu importante nasaun nian, kuandu bem-estar forsa nian di’ak nasaun moris iha prosperu tanba seguransa diak. Ha’u nia apoiu ba forsa armada sei kontinua tanba ha’u lakohi buat ne’ebé ha’u forma iha 2001 monu ba rai,” dehan nia.

Tenente Jenerál Lere Anan Timur nia mandatu lidera F-FDTL durante tinan haat hahú hosi 2015 to’o 2019, hafoin prolonga ka estende tan ba períodu ida tán to’o tinan ualu (8) hodi hala’o ninia mandatu to’o outubru tinan 2022 ne’e.

Notísia Relevante: Lere Kontinua Prontu Serbí Estadu

Jonalista :  Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here