Membru Konsellu Administrasaun APORTIL, I.P halo jurmentu molok simu pose hosi Ministru Transporte no Komunikasaun, José Agostinho da Silva, iha salaun MTK, Caicoli, tersa (25/01). Imajen TATOLI/Francisco Sony

DILI, 25 janeiru 2022 (TATOLI)—Governu liuhosi Ministru Transporte no Komunikasaun (MTK), José Agostinho da Silva, tersa ne’e, fó pose ba membru Konsellu Administrasaun Autoridade Portuáriu Timor-Leste, Institutu Públiku (APORTIL, I.P).

Seremónia pose ne’e bazeia ba despaixu Primeiru-Ministru (PM), Taur Matan Ruak, numeru 004/PM/1/2022, hodi ezonera membru Konsellu Administrasaun APORTIL, I.P, kompostu hosi Flávio Cardoso Neves hosi kargu Prezidente, José Madeira Marques hosi Vogál I, Joana Ribeiro hosi kargu vogal II.

Enkuantu, despaixu daruak ho númeru 005/PM/1/2022, hodi nomea membru Konsellu Administrasaun APORTIL, I.P ba períodu tinan 2022-2025, kompostu hosi Lamartino de Oliveira nu’udar Prezidente, Joe Alex Nikson da Cruz Gusmão nu’udar Vogál I, no Tito da Costa Freitas Moreira nu’udar Vogál II.

Durante seremónia, Ministru José Agostinho, klarifika razaun fundamentu Governu ezonera estrutura Konsellu Administrasaun molok mandatu ramata, tanba konsidera la obsede ba regra administrativa.

Ministru Trasporte no Komunikasaun, José Agostinho da Silva. Imajen TATOLI/Francisco Sony

“Nu’udar servidór Estadu, bainhira ita-nia servisu la tuir ona regra, la kumpre ona orientasaun no ikus mai aktu ne’e fó prejuizu ba Estadu, ne’e labele, tanba bainhira ita ko’alia no servisu tenke tuir regra no defende interese Estadu, entaun situasaun ne’e tenke iha regra no sentidu Estadu. Ida-ne’e grave, ne’ebé nu’udar ajente servidór no implementadór Estadu nian, bainhira ezekuta osan povu nian ne’ebé aprova ona, tenke ho responsabilidade, kualidade, no defende interese Estadu,” Ministru José Agustinho hateten iha seremónia pose ba membru Konsellu Administrasaun APORTIL, I.P, iha salaun MTK, Caicoli, tersa ne’e.

Notísia relevante: MTK Husu Konsellu Foun APORTIL Kria Servisu Ne’ebé Armonia Iha Knaar Fatin

Ministru dehan, aktu ne’ebé estrutura sesante komete durante ne’e liga ho ró-ahi Tranship II.

“Atu dehan kontratu ne’ebé halo tuir regra no kontratu públiku, selebra ona no ema apoia ona ita-nia populasaun hodi asegura konetividade via marítima durante ne’e, entaun Governu nia dever tuir kontratu ne’ebé selebra ona, katak tenki halo pagamentu, maibé aktu ne’e la akontese,” Ministru esplika.

Nune’e, tuir governante ne’e, bainhira la kumpre dever halo pagamentu, maka bele fó prejuizu ba Estadu, tanba ne’e tenki hatuur desizaun.

“Ne’e kontratu públiku, nune’e bainhira mosu irregularidade, karta hosi Komisaun Antí-Korrupsaun (CAC, sigla portugés) sita klaru katak la interven iha prosesu administrasaun, signifika bele halo pagamentu, maibé tanba sá mak la kumpre dever, razaun ida tan maka rezultadu inspesaun hosi inspetór Estadu no rekomendasaun sira la ezekuta to’o agora, tanba ne’e razaun barak mak hamosu ezonerasaun estrutura sesante,” nia akresenta.

Husu emposadu asume kargu ho responsabilidade

Biban ne’e, governante ne’e husu ba estrutura foun atu presta servisu ho di’ak hodi serví povu no Estadu.

“Ha’u husu ba emposadu sira atu ezerse knaar ho responsabildade, hodi asegura no defende interese Estadu, servisu tuir lei, transparante, no servisu maka’as hodi rekolla reseita. Tanba ne’e, ha’u iha esperansa katak sira sei servisu tuir lei no bele halo mudansa iha APORTIL,” nia apela.

Prezidente APORTIL, I.P, Lamartino de Oliveira. Imajen TATOLI/Francisco Sony

Biban ne’e, Prezidente Konsellu Administrasaun APORTIL, I.P emposadu, Lamartino de Oliveira, komprometidu atu hala’o knaar tuir lei haruka no asegura interese Estadu no sei serbisu maka’as hodi rekolla reseita.

“Operasaun portu nian, ami hatene katak sei lori knaar ida todan maibé nafatin presiza apoia ema hotu. Ami promete sei serbisu tuir regra ne’ebé estabelese ona,” nia promete.

Iha seremónia tomada pose ne’e, marka prezensa hosi Komisaun Funsaun Públiku (KFP), Provedoria Dereitu Umanu no Justisa (PDHJ), CAC, reprezentante Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), no entidade Estadu seluk, maibé membru Konsellu Administrasaun APORTIL, I.P sesante la marka prezensa.

Flávio Cardoso Neves no membru antes ne’e simu pose iha loron 03 juñu  2019, nune’e konsege asume knaar durante tinan-rua resin.

Antes ne’e, Governu kontrata Ró-ahi KMP Tranship II hodi fasilita movimentu via marítima tanba ró-ahi Success sei ba halo manutensaun no renova dokumentu lisensa, enkuantu ró-ahi Berlin Nakroma avaria desde tinan 2020.

Ró-ahi KMP Tranship II hosi Surabaya, Indonézia to’o iha Dili no atraka iha portu Dili iha loron 25 maiu.

Governu liuhosi MTK halo kontratu ho empreza estranjeiru hosi Indónezia hodi bele opera ró-ahi ne’e iha Timor-Leste, ne’ebé operasaun semana ida dala-ida, iha segunda ho distinasaun Oé-cusse-Dili-Ataúro no Dili-Oé-cusse-Ataúro.

Kontratu ho kompañia estranjeiru ne’e ba kada fulan $220.000, ho ninia kapasidade tula pasajeiru hamutuk na’in-300 inklui sasán ho kapasidade tonelada 1.000-resin.

Notísia relevante: CAC halo inspesaun ba ró-ahi KMP Tranship II

Iha loron 04 juñu 2021, ekipa CAC akompaña hosi Diresaun Nasionál Transporte Marítima (DNTM) halo ona investigasaun ba Ró-hi KMP Tranship II tanba mosu preokupasaun hosi Parlamentu Nasionál no publiku relasiona kontratu ró foun, karik mosu indísiu krime.

Iha atividade inspesaun deteta katak mosu irregularidade iha prosesu aprovizionamentu.

Aleinde ne’e, rezultadu inspesaun MTK antes ne’e kontráriu ho CAC, ne’ebé orgaun independente ne’e lori ona dadus hodi kruza verbalmente ho Dirijente DNTM no rekomenda halo komparasaun no re-inspesaun fali tuir dadus hosi komisaun.

Maski CAC estuda no kruza informasaun sira, maibé nota katak hafoin lori ro-ahi Tranship II mai Timór mak foin selebra kontratu no halo kontratu mak foin orienta halo prosesu aprovizionamentu.

APORTIL, I.P haruka ona pedidu mai CAC hodi halo andamentu administrativa balun ne´ebé presiza asegura, nune´e bele realiza pagamentu ba kontratu Governu, maibé to’o agora seidauk akontese.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here