Flavio Cardoso Neves, Prezidenti APORTL hamutuk ho nia vise nain rua halao juramentu wainhira simu pose iha salaun MTK, Caicoli, Segunda (3/6/2019). Imajen/Antonio Goncalves

DILI, 3 juñu 2019 (TATOLI)-Ministru Transporte no Komunikasaun, José Agostinho da Silva, husu ba membru Konsellu Administrasaun Portu Timor-Leste atu hala’o servisu tuir kompromisu ne’ebé halo ho ekipa no kria ambiente traballu ne’ebé armonia iha knaar nafatin.

Ministru José Agostinho da Silva mensiona lia hirak ne’e iha ámbitu serimónia  pose ba membru Konsellu Administrasaun Portu Timor-Leste, ohin, iha salaun Ministériu Transporte no Komunikasaun (MTK), Caicoli, Dili.

Membru hirak ne’ebé simu pose ba mandatu tinan tolu ne’e, kompostu hosi Flávio Cardoso Neves hanesan Prezidente APORTIL, José Madeira Marques nu’udar vogál I no Joana Ribeiro nu’udar vogál II..

Ministru José Agostinho da Silva husu atu membru foun hirak ne’e kolabora ho estrutura tuan no hatudu espíritu boa vontade hodi hala’o knaar. Tanba ministériu nia natureza servisu mak oinsá rekolla reseita ba kofre Estadu no identifika kanál reseita sira ne’ebé iha. Ida ne’ebé funsiona tanba lei iha ona no ida ne’ebé seidauk, enkuadramentu jurídiku sira kria lei ba kanál sira ne’ebé ladauk funsiona.

Prezidente APORTIL, Flavio Cardoso Neves. Imajen/Antonio Goncalves

Iha fatin hanesan, prezidente APORTIL, Flávio Cardoso Neves, hatete importante ba konsellu foun mak servisu hamutuk nafatin ho membru tuan tanba servisu ne’ebé sira halo iha barak ne’ebé mak suporta nafatin atu servisu ne’e bele hotu tuir planu ne’ebé ministériu iha.

“Hanesan estrutura foun atubele haree fali programa ne’ebé sai prioridade iha área Portu nian, oinsá mak kolabora ho instituisaun relevante hodi nune’e parte APORTIL bele kontribui másimu ba asaun sira ne’ebé APORTIL atubele submete ba,” tenik eis Vise-Ministru Transporte no Komunikasaun iha Governu Konstitusionál Dalimak ne’e.

Prezidente APORTIL sesante, Constantino Soares, hatete, relasiona ho progresu durante asume knaar iha APORTIL ne’e mak projetu ne’ebé sei iha andamentu mak projetu boot ne’ebé koopera ho Governu Japaun ba konstrusaun fasilidade akostajen ferry ne’ebé atinje ona porsentu 90 no hein iha outubru, tinan ne’e, bele inaugura ona.

Nia informa mós katak, projetu seluk mak asinatura kontratu ba segundu ró-ahi pasajeiru ne’ebé hein katak tribunál konta bele aprova projetu ne’e depois hahú ona prosesu.

“Projetu rua ne’e konsideradu projetu ne’ebé ho valór elevadu no agora ne’e kabe ona ba kompeténsia konsellu administrasaun foun atubele ezekuta bá oin,” hateten Constantino Soares.

Prezidente sesante ne’e sujere ba membru foun atu kontinua planu ne’ebé iha bá oin mak ligasaun transporte marítima ba parte Leste Timór nian hanesan estudu viabilidade, nune’e kuandu ró foun ne’e mai bele uza ona fasilidade iha ne’ebá.

“Iha buat barak mak tenke kontinua bá oin, kapasitasaun rekursu umanu, aprezentasaun no preparasaun baze legál atu bele fortifika serbvsu APORTIL nian no mós rekrutamentu foun ba funsionáriu iha APORTIL,” hateten Constantino Soares.

Jornalista      : Maria Auxiliadora

Editór             : Francisco Simões

HAKEREK NO HATÁN

Please enter your comment!
Please enter your name here