Ekipa hosi CAC, akompaña hosi DNTM halo observasaun ba ró-ahi KMP Tranship II, ne’ebé atraka iha Portu Dili, Colmera, sesta (04/06). Imajen TATOLI/Natalino Costa

DILI, 04 juñu 2021 (TATOLI)–Ekipa hosi Komisaun Antí Korupsaun (CAC, sigla portugés), akompaña hosi Diresaun Nasionál Transporte Marítima (DNTM), halo inspesaun ba ró-ahi KMP Tranship II. 

Tuir Adjuntu Komisáriu CAC, Luís Oliveira Sampaio, ekipa halo inspesun tanba iha semana kotuk iha reajen maka’as hosi Parlamentu Nasionál (PN), bainhira Autoridade Portuáriu Timor-Leste (APORTIL) halo reuniaun ho Komisaun E (infraestrutura), ne’ebé la konkorda atu kontrata ró foun bainhira ró-ahi Berlin Nakroma halo manutensaun.

“CAC nia prezensa labele konfunde hanesan opozisaun ba Governu, tanba iha kazu balun ita tenke aperta no tenke hatan duni, bainhira atu asegura instituisaun Estadu sira funsiona tuir lei,” Adjuntu Komisáriu CAC hateten hafoin ramata inspesaun, iha Portu Dili, sesta ne’e.

Notísia relevante: Ró-ahi KMP Tranship II halo operasaun kada semana dala-ida

Nia dehan, daudaun ekipa sira halo hela akompañamentu besik no rekolla dokumentu sira hanesan kontratu sira ne’ebé maka iha.

“Ami estuda mós prosesu sira ne’ebé la’o ba kotuk, tanba ne’e ita hakarak haree hamutuk, la’ós kapasidade CAC atu haree tanba ita la’ós área espesífiku ba ró, maibé ita hakarak haree ein termu prosedimentu ne’e la’o halo nusa,” nia akresenta.

CAC hetan reklamasaun hosi kompañia nasionál, ne’ebé kestiona tanba sa la utiliza ró ne’ebé iha maski iha dokumentu tolu mate no bainhira atu halo renovasaun, tanba COVID-19 mak la konsege maibé kompañia refere halo hela komunikasaun hodi halo renovasaun dokumentu.

“Ekipa sei halo serbisu, kuandu iha ona ninia konkluzaun maka ami sei fó hatene tanba prosesu la’o hela, dokumentu sira tenke asegura no ita labele pronunsia buat sira ne’e sein analiza profunda,” nia hatutan.

CAC hakarak hetan relatóriu hosi Ministériu Transporte no Komunikasaun, relasiona ho aluga ró ne’e, karik iha indísiu krime maka CAC sei submete ba Ministériu Públiku.

“Ita sei ko’alia ho autoridade kompetente, iha kazu ne’e Ministériu Transporte Komunikasaun ne’ebé halo kontratu ho ró-ahi KMP Tranship II,  kuandu iha indísiu seluk ho ligasaun krime, ami sei halo ligasaun filafali ho diresaun seluk iha CAC rasik no buka koordena ho autoridade kompetente hosi Ministériu Públiku hodi bele haree prosesu sira,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here