Primeiru-Ministru, Taur Matan Ruak, simu Representante Residente Internasional Finance Corporation (IFC), David Freedman. Iha Palásiu Governu, tersa (25/01). Imajen Tatoli/Francisco Sony

DILI, 25 janeiru 2022 (TATOLI)–  Primeiru Ministru, Taur Matan Ruak, tersa ne’e, hala’o enkontru ho ekipa The International Finance Corporation (IFC), hodi aprezenta kompromisu no  programa organizasaun ne’e atu kontinua apoia dezenvolvimentu Timor-Leste.

“Ami hala’o enkontru ho Primeiru Ministru atu introdús ami nia programa IFC atu ba oin hodi halo kontribuisaun ba dezenvolvimentu iha nasaun ne’e,” Reprezentante Rezidente IFC iha Timor-Leste David Freedman, hafoin enkontru kortezia ho Xefe Governu iha  Palásiu Governu-Dili.

Notísia relevante:  Konsultór IFC aprezenta faze inísiu estudu viabilidade abitasaun iha Hera

Representante Rezidente International Finance Corporation (IFC), David Freedman. Imajen Tatoli/Francisco Sony

Tuir nia IFC nia knaar importante iha Timor-Leste mak foku liu ba parseria ho setór privadu sira no setór públiku sira hodi hala’o dezenvolvimentu.

“Dezenvolvimentu setor privadu sai hanesan kompetensia ba IFC nia misaun, entaun ita diskute barak ho Primeiru Ministru no ami mós rona hanoin lubuk ida ba oin ita sei implementa saida mak iha,” nia dehan.

Tanba IFC apoia ona projetu boot ne’ebé la’o hela iha Timor-Leste portu baia Tibar, liuhosi parseria ho Governu halo estudu viabilidade no dezenvolve projetu to’o halo konkursu no ikus bele asina kontratu ho kompaña privadu atu bele investe osan hodi dezenvolve portu ne’e.

“Portu Tibar ita hala’o ona, agora IFC mós diskute hela ho Governu estuda hela no prepara projetu tolu ida mak Aeroportu Dili atubele halo espansaun no projetu abitasaun iha Hera atu fó uma ba timór-oan sira iha Dili inklui sistema saúde nian atu hadi’a sistema saúde  hodi ema hotu bele asesu,”  nia afirma.

Notísia relevante:  IFC Hakarak Halo Planu Mestre ba Projetu Aeroportu Dili

Jornalista : Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here