Embaixadór Japaun ba Timor-Leste, Hiroshi Minami. Imajen: Tatoli

DILI, 16 agostu 2019 (TATOLI)–Embaixadór Japaun ba Timor-Leste, Hiroshi Minami, hateten maski Governu Japaun no Timor-Leste seidauk troka nota ofisiál kona-ba projetu Aeroportu Internasionál Prezidente Nicolau Lobato, Dili, maibé nia Governu nafatin ho kompromisu atu fó apoiu no agora atu halo planu mestre.

“Agora dadauk, grupu hosi International Finance Corporation (IFC) vizita Timor-Leste atu halo planu mestre ida, no horsehik ha’u ho ema hosi Japan Internastional Cooperation Agency (JICA) iha enkontru ho grupu ne’e”, nia tenik ba jornalista sira iha Palásiu Governu, hafoin hasoru malu ho Xefe Governu, Taur Matan Ruak, sesta ne’e. 

Nia hatutan: “Hau ko’alia ho Primeiru-Ministru, Taur Matan Ruak, kona-ba projetu Aeroportu Prezidente Nicolau Lobato no ha’u-nia Governu nia pozisaun laiha mudansa. Tanba Governu Japaun halo ona desizaun kona-ba asisténsia ba projetu aeroportu ida ne’e”.

Notísia Relevante: Governu Hakarak Aeroportu Dili Ho Rekizitu Padraun Internasionál

Diplomata ne’e fiar, Governu Timor-Leste no Governu Japaun sei iha konkordánsia ba projetu hadi’a Aeroportu Comoro, tanba Governu Japaun halo ona desizaun atu fó asisténsia orsamentu milliaun $44 ba konstrusaun.

“Agora dadauk iha difikuldade tanba Governu rua seidauk iha konkordánsia formál. Hafoin iha konkordánsia, ha’u-nia Governu sei halo konkursu hodi hahú projetu refere”, Hiroshi akresenta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here