Lokál atu harii abitasaun foun iha Hali-Dolar, Hera, munisípiu Dili. Imajen/MOP

DILI, 21 maiu 2021 (TATOLI)—Ekipa téknika hosi Ministériu Obra Públika (MOP) akompaña  aprezentasaun hosi Konsultór International Finance Corporation (IFC) kona-ba estudu viabilidade projetu abitasaun ho presu asesível ho modalidade Unidade Parseria Púbilka no Privada (PPP).

Ekipa ne’ebé partisipa aprezentasaun via virtuál ne’e, hosi Diresaun Jerál Abitasaun no Urbanizmu (DGHU, sigla portugé), Diresaun Nasionál Edifikasaun (DNE), asesór Gabinete Ministru no Vise-Ministru, tékniku Planeamentu Urbanu no Abitasaun inklui ekipa téknika hosi Unidade PPP hosi Ministériu Finansa (MF) ne’ebé hamutuk hamahon-an iha Project Evaluation Team (PET).

Telekonferénsia ne’e ho objetivu atu trasa serbisu konsultór IFC ba faze inísiu projetu, ne’ebé hahú ho estudu viabilidade ba área designada abitasaun iha Hali-Dolar, Hera, munisípiu Dili.

“Ekipa téknika no konsultór ko’alia kona-ba akontesimentu inundasaun iha inísiu fulan-abríl, ne’ebé fó risku ba populasaun sira-nia seguransa moris, propriedade no meiu hodi sustenta moris,” refere nota impresa ne’ebé Agência TATOLI asesu, sesta ne’e.

Nune’e mós, halo diskusaun kona-ba projetu sira ne’ebé la’o ona iha pasadu, inklui ninia jestaun no rezultadu estudu iha área refere hodi bele fó hanoin kona-ba planu estratéjiku inklui meiu halo mitigasaun ba risku sira liga ho fatór ambiente.

Iha enkontru ne’e, ekipa mós identifika lakuna no obstákulu sira inklui pandemia COVID-19 ne’ebé aprezenta difikuldade no prejudika ba kalendáriu serbisu ne’ebé hatuur ona iha Financial Advisory Service Agreement (FASA).

Haktuir akordu ne’ebé asina ona entre Governu Timor-Leste reprezenta hosi MOP no MF hamutuk ho IFC, iha loron 22  dezembru 2020, foka ba inisiasaun estudu viabilidade hodi harii uma ka abitasaun foun hamutuk unidade 2000 iha área Hali-dolar, suku Hera, munisípiu Dili.

Aleinde ne’e, iha futuru sei implementa mós iha eis merkadu Comoro ne’ebé identifikadu ona hosi Ministériu Justisa (MJ) liuhosi Diresaun Jerál Terra no Propriedade iha tinan 2019 liubá.

Orsamentu ba estudu harii abitasaun ne’e aprova ona iha reuniaun Konsellu Administrasaun Fundu Infraestrutura (KAFI), bainhira aprezenta hosi Vise Ministru Obra Públika, Nicolau Lino Freitas Belo, iha tinan 2020.

Nune’e, iha faze estudu, avaliasaun no prosesu aprovizionamentu atu harii abitasaun foun iha Hera, sei hala’o durante tinan ida ho balun (fulan 18), ho orsamentu hamutuk $550.000, ne’ebé iha faze inísiu estudu viabilidade sei han tempu fulan-sia no sei tuir kedas ho faze seluk inklui jestaun PPP nian.

Planu no polítika VIII Governu iha área abitasaun no urbanizmu atu organiza di’ak liután kapitál Dili, nune’e Governu esforsu-an atu harii uma ba komunidade ho organizadu, ho tipu presu asesível no resiliente ba mudansa klimátika, no asesível ba populasaun ho rendimentu kiik.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here