Pesoál Saúde iha sentru saúde Vera Cruz halo hela atendimentu ba labarik sira-ne’ebé hetan moras dengue, kuarta (19/01/2022). Imajen Tatoli/Antonio ‘Dasiparu’ Gonçalves.

DILI, 25 janeiru 2022 (TATOLI)—Prezidente Grupu Parlamentár Mulher Timor-Leste (GPMTL), Lídia Norberta, husu Ministéiru Saúde (MS) atu aumenta fasilidade sira iha ospitál hodi atende pasiente ligadu ho kazu moras dengue ne’ebé agora númeru aas.

Notísia Relevante:  Kazu dengue sa’e ba 835 no mate na’in-16

Haree ba kazu númeru dengue ne’ebé makaas mak membru GPMTL iha segunda (24 janeiru 2022) hola inisiativa hala’o fiskalizasaun hodi observa direta kondisaun iha Hospitál Nasionál Guido Valedares (HNGV), sentru saúde Formosa no sala izolamentu Vera Cruz.

Deputada Lidia Norberta hateten, dehan informasaun ne’ebé hatudu katak númeru moras dengue aumenta dezde iha natál to’o agora iha mós ema balun lakon vida no médiku sira konsidera hanesan surtu ida.

‘’Horisehik (segunda, 24/01) ami ba vizita haree númeru aumenta maibé kondisaun infraestrutura ita-nian HNGV la sufisiénte duni atu bele akomoda pasiente barak ne’ebé iha. Ami nota iha ne’ebá kama ida bele akumula labarik na’in-rua ka tolu,” Deputada Lidia Norberta, levanta iha plenária Parlamentu Nasionál hafoin hala’o fiskalizasaun hodi observa direta kondisaun iha Hospitál Nasionál Guido Valadares, sentru saúde Formosa no sala izolamentu Vera Cruz, tersa ne’e.

Maske nune’e, nia informa, iha HNGV sala emerjénsia no pediátria ne’e nakonu ho pasiente to’o HNGV buka fali espasu balun iha HNGV rasik maibé kontinua fatin la to’o no sira klasifika pasiente ne’ebé presiza atendimentu ba pasiente moderadu ho kmaan uitoan transfere ba iha sentru saúde Formosa no Vera Cruz.

“Maibé ami horisehik ba iha sentru saúde Formosa, iha kama ida-rua mamuk maibé espasu kondisaun ladun di’ak. Ba fali sentru saúde Vera Cruz, ita haree katak ninia espasu, fasilidade no atendimentu di’ak,” nia hateten.

Iha fatin tolu ne’e hanesan HNGV, sentru saúde Formosa no sentru saúde Vera Cruz hatudu nafatin rekursu médiku sira iha maibé la sufisiente atu atende situasaun sira hanesan ne’e.

Kestaun ne’ebé membru GPMTL nota mak la’ós médiku sira laiha kapasidade maibé forsa mak la to’o atu atende situasaun ida-ne’ebé ita konsidera hanesan surtu.

Tanba ne’e, husu Governu presiza aumenta tan ventiladór iha sala pediátria iha HNGV, monitór ba oksijéniu nian, apoiu rekursu umanu ba iha HNGV no sentru saúde Formosa ho Vera Cruz tanba médiku sira iha ne’ebá haree sira la halo rotasaun tenke sakrifika an loron-kalan halo servisu, nune’e presiza aloka rekursu umanu sufisiente ba ida-ne’e.

Nune’e mós, makina reajente presiza bele aumenta tán, aumenta númeru kama, aumenta ai-moruk, hadi’a haris-fatin ka hadi’a instalasaun sira iha sentru saúde Formosa no mákina ajuda ofisiál laboratóriu hodi bele fasilita sira-nia analiza ho lais.

“Vizita fatin tolu ne’e se bele makina sira-ne’ebé importante Governu presiza halo akizisiun hodi hola tau mós ospitál iha munisípiu sira, tanba agora dadaun HNGV simu mós pasiente sira hosi munisípiu sira tanba de’it kondisaun iha munisípiu balun laiha,” nia dehan.

Governu tenke haree didi’ak kondisaun alimentasaun ba pasiente sira tanba kantina ne’ebé kompañia sira halo no tein ba pasiente sira, dalaruma ho kondisaun ladún di’ak tanba pasiente moras hahán mai malirin ona.

“Nune’e se bele haree kantina ba labarik sira hanesan kompañia dalaruma fó sasoro ba labarik sira to’o iha ne’ebá malirin tanba nia maneira konserva dalaruma ladi’ak. Maibé se iha kantina hanesan daudaun iha sentru saúde Vera Cruz iha ona kuziña no kantina ida iha kotuk, no se bele aselera prosesu hodi kompañia bele fornese ho di’ak mós ba pasiente sira,” nia dehan.

Aleinde ne’e, atu atende ba kazu moras dengue ne’e, Minsitériu Saúde (MSI) prepara ona fatin Tasi-Tolu hanesan sala internamentu bakazu kmaan no kondisaun iha Lahane bainhira iha pasiente bele aloka kedas.

Deputada Fretilin ne’e husu MS presiza haree mós aloka ona orsamentu ba tinan 2023 hodi haree ba iha espasu ne’ebé iha HNGV no MS presiza transforma sentru saúde Vera Cruz transforma sai osptiál munisipál.

Notísia Relevante: PN sei halo debate urjénsia ho MS kona-ba kazu dengue

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here