Ekipa CVTL halo fumigasaun ba atuasaun kazu dengue iha bairo Kampu Paru Dili, loron sabadu (22/01). Imajen Tatoli/Francisco Sony

DILI,24 janeiru 2022 (TATOLI)— Ministériu Saúde (MS) liuhosi Diresaun Nasionál Saúde Públika, Departamentu Vizilánsia Epidemolojia, relata ohin kazu dengue hamutuk 835 hosi númeru ne’e mate na’in-16 ne’ebé maioria labarik ki’ik.

“Situasaun kazu dengue iha Timor-Leste, ohin loron 24 janeiru 2022, kazu dengue hamutuk 835 no kumulativu óbitu na’in-16,” refere nota ne’ebé Agência TATOLI asesu, segunda ne’e.

Notísia relevante: Pasiente dengue sa’e ba 713 no óbitu na’in-16

Kazu ne’e maioria deteta hosi munisípiu Dili ho totál 570, Baucau iha kazu 32, Manatuto 57, Covalima 30, Ermera 63, Manufahi 39, Viqueque na’in-haat, Ainaro neen, Liquiça neen, Aileu ualu no Bobonaro 20.

Munisípiu Dili nafatin rejista kazu ne’ebe aas iha semana dahuluk to’o semana datoluk fulan- janeiru hamutuk 466, kompostu Dom Aleixo 283, Cristo-Rei 110, Na’in-feto 89 no Vera-Cruz 82

Iha fulan ne’e, óbitu iha semana dahuluk iha na’in-ida ne’ebé relata hosi Dili, no iha semana datoluk iha óbitu na’in-haat, hosi Ermera, na’in-ida hosi Ainaro, na’in-ida hosi Bobonaro, na’in- rua hosi Covalima no munisípiu Dili rejista tan óbitu  na’in-hitu.

To’o ohin loron fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 139, Klínika Fatumeta 88, sentru saúde Comoro 133, sentru saúde Vera-Cruz 47, sentru saúde Formosa 95, sentru saúde Becora 57, sentru saúde Metinaru haat,  Klínika Bairru Pité na’in-rua, no Klínika Motael na’in-ida.

Nune’e, Ministériu Saúde apela ba populasaun iha Dili laran no mós iha Munisipiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka sente laran sa’e, liman-ain no sikun moras hodi bele hetan atendimentu hosi profisionál saúde sira.

Apela mós ba autoridade munisipál no autoridade lokál atubele orienta komunidade halo limpeza jerál iha suku no bairru-sira liuliu fase tanke, bidon ka balde tau bee semana ida dala ida.

Hamoos sasán ka limpeza hanesan roda aat, bazu ai-funan atu susuk labele tau tolun, haloot ropa ho di’ak iha ita nia uma laran, uza ropa ne’ebé liman naruk karik toba iha tempu loron, uza aimoruk hanesan replente ka autan, uza muskitéru karik toba iha tempu loron no so’e lixu iha nia fatin.

Notísia relevante: Kazu dengue aumenta, família pasiente preokupa HNGV laiha espasu

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here