Laiha espasu, médiku HNGV fó tratamentu ba pasiente-sira iha koridór. Imajem/Felicidade Ximenes

DILI, 25 janeiru 2022 (TATOLI)— Prezidente Parlamentu Nasionál (PPN), Deputadu Aniceto Longuinhos Guterres Lopes, hateten halo ona ajenda atu hala’o debate urjénsia ho Ministériu Saúde (MS) kona-ba kazu dengue ne’ebé kada loron aumenta no hamate labarik sira iha territóriu nasionál.

“Ami mai vizita hodi haree direta kondisaun fatin iha Hospitál Nasionál Guidu Valadares (HNGV) hanesan preparasaun ida ba ami, atu hala’o debate urjénsia iha segunda feira, atu ko’alia ho Governu, liuliu rona hosi Ministra Saúde kona-ba moras dengue ne’ebé mak kada loron nia númeru sa’e makaas no halao prenvesaun,” Prezidente PN Aniceto, hateten ba jornalista sira iha HNGV-Bidau, tersa ne’e.

Notísia relevante: Kazu dengue aumenta, família pasiente preokupa HNGV laiha espasu

PPN hato’o kestaun ne’e banhira ho komisaun F ne’ebé trata asuntu saúde no edukasaun hala’o vizita ba HNGV hodi haree direta kondisaun ka espasu ne’ebé sai problema ba pasiente sira atu hetan atendimentu hosi profisionál saúde.

Tanba Parlamentu nasionál akompaña moras dengue hamate ona labarik na’in-16 no pozitivu dengue sa’e ba 835.

Prezidente Parlamentu Nasionál (PPN), Aniceto Longuinhos Guterres Lopes. Imajen TATOLI/Francisco Sony.

“Nune’e, ha’u dertemina ona ajenda fiksa atu debate urjénsia ho Governu liuliu ho Ministra Saúde inklui entidade relevante sira tanba moras ne’e la’ós atu halo mitigasaun, maibé atu halo prevensaun tanba moras ne’e tuir tempu bainhira tempu udan,” Deputadu Aniceto akresenta.

Iha biban hanesan, Diretór Klíniku HNGV, Marcelino Correira, hateten membru Parlamentu Nasionál mai haree kondisaun no espasu iha ospitál liuliu ba moras dengue.

“Ita iha ona planu atu muda pasiente sira ne’ebé mak kaman sira ne’e ba iha Tasi-Tolu no sira ne’ebé mak kritiku  nafatin  iha HNGV,” Diretór Klíniku ne’e akresenta.

Tuir dadus Ministériu Saúde (MS) liuhosi Diresaun Nasionál Saúde Públika, Departamentu Vizilánsia Epidemolojia, relata kazu dengue hamutuk 835, hosi númeru ne’e mate na’in-16.

Kazu ne’e maioria deteta hosi munisípiu Dili ho totál 570, Baucau iha kazu 32, Manatuto 57, Covalima 30, Ermera 63, Manufahi 39, Viqueque na’in-haat, Ainaro neen, Liquiça neen, Aileu ualu no Bobonaro 20.

Munisípiu Dili nafatin rejista kazu ne’ebe aas iha semana dahuluk to’o semana datoluk fulan- janeiru hamutuk 466, kompostu Dom Aleixo 283, Cristo-Rei 110, Na’in-feto 89 no Vera-Cruz 82.

Iha fulan ne’e, MS rejista óbitu hamutuk na’in-16, kompostu hosi munisípiu Dili na’in-ualu, Ermera na’in-haat, na’in-ida hosi Ainaro, na’in-ida hosi Bobonaro, na’in- rua hosi Covalima.

Notísia relevante: Kazu dengue sa’e ba 835 no mate na’in-16

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here