Pesoál saúde hala’o hela atendimentu ba labarik sira-ne’ebé hetan moras dengue. Imajen Tatoli/Antonio Dasiparu.

DILI, 24 janeiru 2022 (TATOLI)—Parlamentu Nasionál husu Ministériu Saúde (MS) atu intensifika asaun hodi hasoru moras dengue tanba kazu kontinua aumenta ne’ebé rezulta mós ema barak mate.

Notisia Relevante: Pasiente dengue sa’e ba 713 no óbitu na’in-16

“Semana kotuk hala’o fiskalizasaun ba ospitál nota katak moras dengue makaas duni, nune’e saida mak ita halo hodi bele solusiona tenke intensifika asaun no prevensaun ho lais ka urjente tanba afeta ba sidadaun nia moris,” Prezidente Komisaun F ne’ebé asuntu Saúde, Seguransa Sosiál no Igualidade Jéneru, Noé da Silva Ximenes ‘Buka Tuir’, hateten iha Parlamentu Nasionál, segunda ne’e.

Tan ne’e, nia dehan, presiza foti asaun lais liután hodi halo asaun atu atende no halo prevensaun, tanba buat ne’ebé identifika mak problema kapasidade insfraestrutura la to’o atu akumula moras sira iha ospitál ne’ebé tama ho kapasidade boot.

Maibé, nia dehan, iha ona alokasaun pasiente moras dengue iha Dili ba sentru izolamentu Vera Crus ne’ebé hetan tratamentu ho di’ak.

Deputadu PLP ne’e hateten, ho komunikasaun ministéiru saúde oinsá haree espasu ne’ebé mak iha hodi bele fasilita pasiente sira-nia fatin, no tuir informasaun ne’ebé iha katak halo ona observasaun ba sentru izolamentu hanesan Tasi-Tolu atu aloka pasiente sira ba.

Notísia Relevante: Prevene dengue, OMS apoia ekipamentu no aimoruk rega susuk ba MS

“Tan ne’e, presiza nafatin halo asaun no mós prevensaun ninian hanesan fumigasaun la’o nafatin hodi bele prevene mors dengue ne’e,” nia dehan.

Deputadu Fretilin, António dos Santos ‘55’, hateten munisípiu Ermera okupa númeru kazu  dengue daruak iha territóriu, nune’e husu ministériu tutela atu tau atensaun sériu labele de’it iha Dili maibé ba mós munisípiu sira.

Prezidente Parlamentu Nasionál, Deputadu Aniceto Longuinhos Guterres Lopes, fó sai katak PN tau ona ajenda sei konvida Ministra Saúde iha semana oin hodi bele esplika ba PN kona-ba asaun Governu nian hasoru moras dengue ne’ebé daudaun númeru kazu sa’e makas.

Notísia Relevante: Infografia: Kazu Dengue iha Timor-Leste

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here