Ekipa CVTL halo fomigasaun ba atuasaun kazu dengue iha bairo Becusi Sentral, loron kinta (20/01). Imajen Tatoli/Francisco Sony

DILI, 20 janeiru 2022 (TATOLI)—Reprezentante Organizasaun Mundiál Saúde iha Timor- Leste, Arvind Mathur, informa, fó ona apoia ekipamentu kombate dengue ba Minsitériu  Saúde hodi halo prevensuan ba moras dengue iha Timor-Leste.

“Ami apoiu ona ekipamentu kombate dengue, hanesan dengue teste kit hamutuk unidade 10.000, aimoruk kímiku abate box 350 no malation lítru 500 hodi halo prevensaun ba moras dengue ne’ebé mak daudaun ne’e númeru aas iha Timor-Leste,’’ Arvind Mathur hateten ba jornalista sira iha Novo-Turismo, kinta ne’e.

Notísia Relevante: Pasiente dengue rekuperadu na’in-204, presiza asaun rega susuk

Tuir nia aimoruk kímiku abate ne’ebé apoia ba Ministériu Saúde ne’e hodi distribui ba   komunidade hodi tau iha tanke bee, nune’e bele hamate susuk tolun sira dodi hado’ok an husi moras dengue.

Reprezentante Organizasaun Mundiál Saúde (OMS) iha Timor-Leste, Arvind Mathur. Imajen Tatoli/Francisco Sony

 “Ha’u mós husu ba ema hotu atu bele foti asaun individu hodi prevene dengue no moras infensaun sira seluk. Organizasaun Mundiál Saúde hamriik hamutuk ho Ministériu Saúde hodi reforsa prevensuan dengue ho komprensivu,” nia kompromete.

Organizasaun Mundiál Saúde halo akizasaun ba ekipamantu no aimoruk kímiku kombate dengue hamutuk $200.000.

Alende fó apoia ekipamentu, Reprezentante Organizasaun Mundiál saúde mós halo kampaña prevensaun dengue liuhosi média sosiál hanesan televizaun no rádiu inklui media-online, nune’e bele garante  konsiénsia  komunidade nian  ba moras dengue

Tanba kampaña ne’e hanesan inisiativa hosi OMS hodi envolve ema hotu partisipa ativu liuhosi atividade prevensaun nian.

Iha biban hanesan, Diretora Jerál Prestasaun Saúde Odete da Silva Viegas, hateten Ministériu Saúde sei halo fomigasaun ba área risku sira iha munisípiu Dili tanba daudaun númeru kazu dengue aumenta maka’as.

“Horiseik ita simu tan apoiu fomigasaun, abate no dengue teste kit hosi Organizasaun Mundiál Saúde, nune’e ekipa sira haree hodi distribui ba área riksu sira atubele halo atuasaun ba prevensaun kazu dengue ne’ebé aas iha munnisípiu Dili,” nia akresenta.

Mama Bolu prontu regra susuk

Entretantu, Koordenadór Mama Bolu, Aquing Ung, hateten membru na’in-19 prontu apoia Ministériu Saúde  atu halo fomigasaun ba área risku sira iha munisípiu Dili.

“Ami preparadu atu apoia Ministériu Saúde atu halo fomigasaun ba área risku tanba dengue ameasa boot liuba labarik sira-nia moris,” koodenadór ne’e akresenta.

Nune’e, Organizasaun voluntáriu ne’e halo ona pedidu ba SAMES atu apoia mákina no aimoruk  fomigasaun,  maibé seidauk resposta.

“Ami enfreta hela problema mákina  no aimoruk atubele  utiliza  hodi  apoiu Governu liuliu Ministériu Saúde  hosi  programa ne’e rasik.Tanba  ami-nia proposta ami husu mak mákina no aimoruk fomigasaun,” nia afirma.

Voluntáriu Mama Bolu halo mós proposta ba Alume Asosiasaun Timór-oan ne’ebé durante hetan bolsu estudu hosi Governu Austrália atu apoia hahan ruma tanba durante ne’e koopera hamutuk iha situasaun COVID-19.

“To’o agora ami seidauk iha atividade ruma atu apoiu komunidade Dili tanba ami sei hein mÁkina no aimoruk hosi SAMES no bainhira iha repsosta pozitivu ruma mak ami reativa fali ami nia grupu voluntariu ida ne’e,” nia kompromete.

Notísia Relevante: Pasiente dengue aumenta ba 521, óbitu nain-sia

Jornalista : Felicidade Ximenes

Editór: Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here