Laiha espasu, médiku HNGV fó tratamentu ba pasiente-sira iha koridór. Imajem/Felicidade Ximenes

DILI, 24 janeiru 2022 (TATOLI)— Reprezentante família pasiente, Cesario Amarál da Silva Magno, hateten nia parte preokupa tebes situasaun liuliu espasu iha Hospitál Nasionál Guido Valadares (HNGV) tanba laiha fatin ba pasiente hodi simu atendimentu hosi profisionál saúde sira.

“Labarik ki’ik-oan ne’e,  nia família kous hamriik hosi kalan to’o dader mak simu atendimentu hosi médiku sira tanba kama la permite atu hatoba labarik afetadu dengue sira,” Família pasiente ne’e, hateten ba Jornalista sira iha HNGV-Bidau, segunda ne’e.

Nune’e, nia husu ba Ministériu Saúde atu buka solusaun di’ak hodi pasiente sira bele hetan atendimentu ho dignu liuliu iha fatin deskansa, hafoin simu atedimentu saúde.

Tanba rezumu epidemiolójia situasaun dengue iha rai laran ne’ebé kontinua aas iha loron ba loron. Tuir dadus ne’ebé fó hosi Ministériu Saúde, iha loron 23 janeiru, kazu dengue hamutuk 728 no kumulativu óbitu nain-16. Maioria kazu ne’e deteta husi Munisípiu Dili ho totál kazu 521, Ermera ho kazu 55, Baucau ho kazu 32, Manatuto ho kazu 32, Manufahi iha kazu 32, Covalima ho kazu 30, Bobonaro ho kazu 14, Ainaro ho kazu haat, Viqueque na’in-haat, Liquiça tolu, Aileu iha kazu ida.

“Ami haree atendimentu hosi médiku sira ne’e di’ak tebes, maibé problema mak espasu no kama mak la sufisiente atu pasiente sira deskansa ba,” nia akresenta.

Hataan ba preokupasaun ne’e, Diretór Jerál Servisu Koorporátivu iha Ministériu Saúde, Marcelino Amaral, hateten, maski hola ona inisiativa transfere pasiente balun ba Vera-Cruz, maibé kontinua enfreta espasu.  Nune’e, Ministra Saúde  orienta atu buka ona alternativa hodi transfere tan pasiente balun ba iha izolamentu Tasi-Tolu.

“Ami diskute ona hodi koloka lojístika no rekursu umanu, atubele lori pasiente balun ba Tasi-Tolu. Tanba Ministra Saúde husu ona HNGV atu koloka médiku espesialista atu haree pasiente ida ne’ebé  mak atu ba iha ne’ebá,” nia akresenta.

Daudaun ne’e, MS hahú koopera ho HNGV atu muda pasiente ne’ebé mak kamaan ba iha Tasi-Tolu hodi fó atendimentu intensivu.

“Ita presiza mak pasiente sira ne’ebé mak krítiku mak iha HNGV, nune’e pasiente kaman ba dengue bá Tasi-Toli iha tempu badak,” nia akresenta.

Totál kama iha HNGV hamutuk 300-resin, no prepara ona kama iha Tasi-Tolu iha kama 100-resin Hospitál António Carvalho Lahane iha kama 35 no mós Sentru Internamentu Vera-Cruz iha kama 100-resin.

Notísia relevante: PN husu Ministériu Saúde intensifika asaun hasoru dengue

Jornalista : Felicidade Ximenes

Editór          : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here