ANPM disemina Lei Kódigu Mineiru ba entidade no Autoridade munisipiu Dili, iha Suai Room Timor Plaza, segunda (24/01). Imajen TATOLI/Francisco Sony

DILI, 24 janeiru 2022 (TATOLI)–Autoridade Nasionál Petróleu no Minerál (ANPM), segunda ne’e, sensibiliza lei númeru 12/2021 30 juñu kona-ba kódigu mineiru ba autoridade no entidade sira seluk iha munisípiu Dili.

Antes ne’e, Prezidente Repúblika, Francisco Guterres Lú-Olo, promulga ona Projetu-lei númeru 4/V (1a) Kódigu Mineiru, ne’ebé tama vigór iha loron 01 janeiru 2022.

Diseminasaun Lei Kódigu Minieru hahú hosi setembru to’o dezembru 2021 no kontinua fali iha tinan 2022 to’o nível postu administrativu, liuliu área ne’ebé identifikadu iha potensiál ba rekursu naturál.

Prezidente ANPM, Florentino Soares Ferreira, hateten, tuir sistema legál Timor-Leste, autór lei iha loron 180 atu halo diseminasaun ba públiku no autoridade relevante kona-ba konteúdu no substánsia lei.

Notísia relevante: PN aprova projetu-lei kódigu mineiru ho unanimidade  

Prezidente ANPM, Florentino Soares Ferreira. Imajen TATOLI/Francisco Sony

“Objetivu prinsipál hosi diseminasaun atu fó efeitu ba explorasaun no exploitasaun atividade mineira ho komóditi mineiru. Tanba ita iha Timor-Leste iha tipu minerál mai hosi metáliku, non metáliku, no minerál estratéjiku hanesan terra estrada, radiativu, entaun ita tenke iha lei ida hanesan kódigu mineiru ne’ebé sai hanesan lei inan ba atividade mina no explorasaun inklui minerál sira iha Timor-Leste,” Prezidente ANPM hateten iha Timor Plaza.

Lei ne’e fó oportunidade ba ema hotu, emprezáriu lokál no internasionál atubele haree posibilidade halo estudu hosi inísiu, ne’ebé identifika fatin balun ne’ebé iha potensialidade, nune’e bele fó oportunidade ba empreza sira dezenvolve minerál sira.

“Ho dezenvolvimentu minerál ne’e, sei fó oportunidade traballu no rendimentu ba empreza sira no Governu, ne’ebé reseita sira ne’e tanba lei kódigu mineiru sei prevee atu kria fundu mineiru ida, tanba tempu naruk ita depende liu ba fundu petrólíferu,” nia akresenta.

Notísia relevante: MPM prioritiza polítika investimentu fundu petrolíferu iha 2022

Aleinde ne’e, lejizlasaun ne’e ninia vantajen mak atu haree liu kontribuisaun exploitasaun mineiru, fó reseita ba Estadu no sei fó mós oportunidade serbisu ba komunidade.

“Tanba ne’e, ha’u-nia esperansa be lei ne’e mak iha tempu pasadu ita iha dezenvolvimentu ba mineiru sira hanesan mármore iha Manatuto, ne’ebé tempu naruk nia laran ita la dezenvolve, nune’e iha mineiru potensiál seluk hanesan osan-mean, kobre, platinu, no fatuk sira seluk ne’ebé kalkáriu bele sai resensionamentál ba nesesidade infraestrutura iha Timor-Leste,” nia tenik.

Iha fatin hanesan, reprezentante Prezidente Autoridade Munisípiu Dili no atuál Sekretariadu António Moniz Clau, agradese tanba bele hetan oportunidade akompaña informasaun importante ne’e.

“Kontente tebes ho sensibilizasaun lei kódigu mineiru ne’e, tanba liuhosi desiminasaun ne’e ita bele hatene rikusoin seluk ne’ebé iha ita-nia rai, tanba durante ne’e ita rona iha rikusoin barak maibé ita atu hahú hosi ne’ebé, ita la hatene,” nia dehan.

Nune’e mós, Reprezentante Veteranu, Sekretáriu Jerál Taksforce ba Asuntu Interese Nasionál, Jorge Alves, agradese ba VIII Governu konstituisionál tanba antes ne’e lei ne’e inisia ona iha tinan 2013 maibé kaduka iha 2016, maibé Governu konsege inisia fali prosesu no Parlamentu Nasionál aprova ho votu unanimidade 56.

“Ohin Timor-Leste hetan retornu ka taxa barak liu hosi ita-nia mina, maibé ita seidauk hetan retorunu ne’ebé másimu hosi turizmu, no agrikultura,” nia hateten.

Projetu-lei Kódigu Minieru iha artigu 162 ho kapítulu 20 no anexu tolu, ne’ebé iha artgiu ida define aprovasaun, artigu tuir mai deskreve polítika mineira, artigu seluk objetivu sira kona-ba estratejia setór mineiru no ikus liu artigu 162 define dispozisaun tranzitóriu.

Lei  ne’e sei vigora bainhira kompleta ona loron 180, ne’ebé públika hosi Jornál Repúblika.

Iha anexu I define klasifikasaun minerál kompostu hosi mineiru metáliku, jemas, mineiru radiuativu, rochas no minerál industriál, karvaun no mineiru de terras raras, anexu kona-ba taxa hosi royalty mineiru no anexu III define renda superfísie.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here