Perfurasaun mina rai-maran iha Covalima. Imajen Tatoli/Jogerjo Guterres.

LIQUIÇA, 28 outubru 2021 (TATOLI)-Ministru Petróleu Rekursu Minerál (MPM), Victor da Conceição Soares, hateten,  iha Orsamentu Jerál Estadu (OJE) 2022 fó prioridade polítika investimentu fundu petrolíferu atu garante kreximentu no sustentabilidade. 

“Ami tau prioridade liu ba área importante atu  garante ba kreximentu no sustentabilidade ba fundu petrolíferu inklui kriasaun ba fundu mineiru,” Ministru Victór, relata iha semináriu Panaroma Orsamentál 2022, iha Tibar-Liquiça, kinta ne’e.

Polítika investimentu fundu petrolíferu iha segmentasaun fundu ba fatin rua, ba karteira likidés atu garante durante proximu tinan-tolu bele iha osan atu finansia Orsamentu Jerál (OJE) no mantein kresimentu, katak osan la foti hosi likidés, maibé investe filafali iha asaun, nune’e futru nia retornu bele finansia fali likidés.

Razaun halo segmentasaun fundu tanba hahú tinan 2019 to’o agora, levatamentu fundu petróliferu sempre liu Rendimentu sustentável Estimadu (RSE), ne’ebé sei fó risku boot ba sustentabilidade fundu sobernu.

Enkuantu, bazeia ba lei númeru 9/2005 kona-ba fundu petrolíferu,  iha artigu 9 kona-ba transferénsua liu RSE, temi katak levantamentu bele to’o 3% de’it.

Atu atinje meta ne’e, MPM  kontinua asegura avaliasaun no aprovasaun ba rekusu petrolíferu no minerál, kontinua dezenvolvimentu rekursu umanu kualifikadu iha area petrolífera, hala’o esforsu hodi konklui enkuadramentu legál sira no asegura planu dezenvolvimentu ba kampu Greater Sunrise, dezenvolvimentu institusional atu fó apoiu ba dezenvolvimentu institusionál.

Alende ne’e, prioritiza dezenvolvimentu indústria mineiru, asegura obrigasaun sira hosi kompaña nasionál petróleu tuir proposaun 56.56%, re-definisaun no implementasaun estrátejia ba dezenvolvimentu petróleu, gas no rekursu minerál iha territóriu nasionál.

Mantein modelu transpárensia elabora relatóriu EITI ba tinan fiskál 2021 diseminasaun no kapasitasaun tuir rekezitu padraun foun EITI no realizasaun ba estudu no investimentu iha setór upstream no downstream hosi Timor Gap-EP.

“Estudu ba sistema petrolífera iha onshore no offshore ba zona rekursu mineral naun metáliku no halo identifikasaun ba potensiál rekursu hidriku subteraneus, mapamentu jeolójiku no jeotékniku, instalasaun ba “core-storage facility” no dezeñu detalladu boa laboratóriu jeolójiku,” Governante ne’e akresenta.

Nune’e mós arendamentu no akizasaun posteriór ba futuru instalasaun insitutisaun MPM no insitutisaun outonómu ne’ebé tutela, kriasaun ba grupu traballu asegura ezekusaun hosi programa Governu, kontinua dezenvolve sekretariadu ba reprezentante foun ba Konsellu Supervizaun ba rezime espesiál Greater Sunrise.

Orsamentu baze ba programa

Alokasaun OJE 2022 ba MPM $22,242,721 me’ebé fahe ba kategoria saláriu no vensimentu $463,702, bens no servisu $ 811,519, kapitál menór laiha, kapitál dezenvolvimentu laiha, transferensia públika $41,000,000, pakote rekuperasaun ekonómiku laiha, hasai ona USD $2,000,000 hodi realoka ba Institutu Petróleu no Jeolójia (IPG).

MPM mós aprezenta proposta adisonál $45,763,842.00 ba Parlamentu Nasional atu finansia funsionamentu instituisaun tuir organika no garante nafatin kreximentu fundu mina-rai no halo aredenadmentu no akizasaun posteira ba futuru instalasaun MPM no institusaun sira.

Iha biban hanesan, Prezidente Institutu Petróleu no Jeolojia (IPG), Gabriel Gaspar Aparício de Oliveira, hateten OJE 2022 ne’ebé mak Ministeriu Finansa (MF) aloka ba IPG liuhosi mpm hamutuk $2,000,000.00 maibé la sufisiente atu ezekuta programa no atividade sira.

“Ami husu atu aumenta ba $4,000,000,00, maibé tékniku sira iha Komite Revizasaun Orsamentu Polítika kua ba $2.000.000 ne’e mak ami preokupa,” Prezidente IPG preokupa.

Tuir nian, ho montante orsamentu ne’e, IPG sei la hala’o atividade iha 2022 tanba bele selu de’it ba saláriu no vensimentu ba funsionáriu.

Notísia Relevante: MF informa polítika investimentu fundu petrolíferu ba Xefe Estadu

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here