Kandidatura Prezidente Repúblika 2022-2027 hosi Partidu Demokrátiku (PD), Prezidente Partidu Demokatiku, Mariano Assanami Sabino no Prezidente Komisáriu Polítika Nasionál PD, Adriano do Nascimentu. Iha salaun Hotel Leokase Raikotu Dili, sabadu (22/01). Imajen Tatoli/Francisco Sony

DILI,22 janeiru 2022 (TATOLI)— Partidu Demokrátiku (PD) liuhosi Konvensaun Nasionál dahuluk, sábadu (22/01), deside Mariano ‘Assanami’ Sabino sai kandidatura ba Prezidente Repúblika hodi kompete iha eleisaun prezidensiál períodu 2022-2027.

Sekretáriu Jerál Partidu Demokrátiku, António da Conceição ‘Kalohan’ hateten, durante konvesaun nasionál, Prezidente Komisaun Polítika Nasionál PD,Adriano do Nascimento ‘Loromau’ deside retira ninia kandidatura hodi fó fiar ba Prezidente PD, Mariano Assanami Sabino hodi avansa ba konkorre iha eleisaun prezidensiál ne’ebé sei realiza iha loron 19 marsu ne’e.

Sekretáriu Jerál Partidu Demokrátiku (PD), António da Conçeição “Kalohan”. Imajen Tatoli/Francisco Sony

“Molok, atu halo votasaun ba kandidatu sira mak, kandidatu Adriano do Nascimento “Loromau” retira nia kandidatura, nune’e meza konvensaun husu aklamasaun hosi reprezentante munisípiu sira inklui Rejiaun Administrativu Espesiál Oé-cusse no Ambeno (RAEOA) no orgaun partidu ne’ebé mak hatuur iha artigu 154, Estatuto Partidu. Nune’e, deside Prezidente PD Mariano ‘Assanami’ Sabino nuudar kandidatu konfirmadu no aprovadu iha konvensaun nasionál atu konkorre ba eleisaun prezidensiál 2022,” Sekretáriu Jerál ‘Kalohan’ hateten ba jornalista sira bainhira ramata konvensaun nasionál dahuluk iha otél Leokasi-Raikotu, sábadu ne’e.

Notísia relevante:  15 janeiru, PD deside kandidatu kompete iha eleisaun Prezidensiál

Iha biban hanesan, Prezidente Komisaun Polítika Nasionál, Adriano Nascimento ‘Loromau’, hatete, deside retira hosi kandidatura hodi fó fiar ba Mariano ‘Assanami’ Sabino atu reprezenta Partidu Demokrátiku ba kompete iha eleisaun prezidensiál.

“Dahuluk, ha’u-nia razaun retira hosi kandidatura tanba ho sujestaun ka rekomendasaun hosi partisipante hosi konvensaun nasionál sira husi munisípiu lubuk ida katak bainhira ha’u ho Prezidente PD Mariano Assanami Sabino tama ba eleisaun no votasaun mak nia nuudar prezidente partidu lakon iha votasaun signifika kreadibilidade hanesan Prezidente Partidu Demokrátiku laiha, nune’e ha’u retira,” Adriano Nascimento akresenta.

Entretantu, Kandidatu Prezidente Repúblika no atual Prezidente PD, Mariano ‘Assanami Sabino, hateten, nia parte prontu ona atu kompete iha eleisaun Prezidensiál 2022.

Prezidente Partidu Demokatiku, Mariano Assanami Sabino. Imajen Tatoli/Francisco Sony

“Hahú ohin ba oin Adriano do Nascimento ho António Conceição sei hamriik iha ha’u nia sorin atu halo kampaña iha fatin ne’ebé deit  hodi hatudu ita-nia solidaridade, tanba ida ne’e mak  kultura hosi partidu Demokrátiku,”Assanami akresenta.

Tanba, Assanami dehan atu sai Prezidente Repúblika la’ós votu mai hosi militante PD, maibé presiza oferese kandidatura ba povu no sai kandidatu ba povu tomak hodi sai Prezidente Repúblika mós ba povu tomak iha Timor-Leste.

“Bainhira, ita sai Prezidente Repúblika atu halo mudansa ba povu no atu kumpre Konstituisaun ne’ebé mak iha. Atu simplifika katak atu sai Prezidente ba maubere-oan, ba povu aileba no ba povu Timor-Leste,” nia kompromete.

Iha ámbitu Konvensaun Nasionál dahuluk ne’e partisipa hosi delegadu no estrutura partidu nian, hahú hosi nivél nasionál no munisípiu hamutuk 409.

Notísia Relevante: PD preparadu hasoru eleisaun prezidensiál 2022

Jornalista  : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here